Aktualitet

Meta thirrje qeverisë: Angazhohuni për t’i rikthyer frymëmarrjen futbollit shqiptar!

Presidenti Ilir Meta i ka bërë thirrje qeverisë që të angazhohet e të marrë një vendim në lidhje me shtyrjen e datës së fillimit të kampionatit të Kategorisë Superiore. Ai thekson se kriza e thellë kushtetuese, institucionale dhe përfaqësuese po përshkallëzohet në përmasa shqetësuese në të gjithë sektorët, përfshirë këtu edhe futbollin. Meta kërkon që kampionati të nisë sa më shpejt që të jetë e mundur. “Kriza e thellë kushtetuese, institucionale dhe përfaqësuese po përshkallëzohet në përmasa shqetësuese në të gjithë sektorët. Futbolli shqiptar, krenaria jonë kombëtare, prej javësh ndodhet në një ngërç, për shkak të vendimit për shtyrjen e datës së fillimit të kampionatit të Kategorisë Superiore, sezoni 2020/2021, që duket se do të vazhdojë për një kohë të pacaktuar në mungesë të vullnetit për gjetjen e një zgjidhjeje të mënjëhershme. I njohur me kërkesat e drejta të Ligës Profesioniste të Futbollit, i bëj thirrje qeverisë që përmes dialogut, bashkëpunimit dhe mirëkuptimit të angazhohet për t’i rikthyer frymëmarrjen futbollit shqiptar, që ka kohë që ndodhet në vështirësi dhe sot kërkon vëmendje e mbështetje nëpërmjet një baze të sigurt ligjore”, tha Meta.