Bashkimi Evropian do të rrisë presionin ndaj presidentit të Bjellorusisë, Aleksander Lukashenko, si kundërpërgjigje ndaj shtypjes brutale të protestave pas zgjedhjeve që blloku i cilësoi si “as të lira, as të drejta”. Pak para takimit të jashtëzakonshëm të Ministrave të Jashtëm të BE-së në Bruksel, autoritetet bjelloruse nisën lirimin e qindra të ndaluarve. Shumë prej të burgosurve folën për kushte të tmerrshme ndalimi, dhunë dhe keqtrajtime të tjera. Edhe organizata ndërkombëtare për të drejta të njeriut, Amnesty International, konfirmoi pretendimet e protestuesve për “torturë të përhapur”. Të paktën dy prej tyre humbën jetën dhe rreth 7 mijë persona u ndaluan prej shpërthimit të revoltës më 9 gusht, pasi rezultatet zgjedhore nxorën fitues presidentin autoritar, Lukashenko për një mandat të gjashtë presidencial me 80 për qind të votave. Ky pretendim u kundërshtua nga kandidatja opozitare, Svyatlana Tsikanouskaja, që detyrua të arratiset në Lituani.