Micron do të shpenzojë deri në 100 miliardë dollarë të paktën gjatë dy dekadave të ardhshme duke ndërtuar një fabrikë të re të çipave kompjuterikë në veri të New York-ut. Projekti, për të cilin Micron pretendon se do të jetë fabrika më e madhe në botë e fabrikimit të gjysmëpërçuesve, pritet të krijojë afro 50 mijë vende pune në New York, me investimin e fazës së parë prej 20 miliardë dollarësh të planifikuar deri në fund të kësaj dekade.
Micron në gusht njoftoi planet e tij për të investuar 40 miliardë dollarë deri në fund të dekadës për të ndërtuar prodhimin e memories në faza të shumta në Shtetet e Bashkuara. Nxitja në investimet e reja të çipave vjen pasi Presidenti amerikan, Joe Biden, nënshkroi Aktin e CHIPS dhe Shkencës në gusht, duke ofruar 52.7 miliardë dollarë subvencione për prodhimin dhe kërkimin e gjysmëpërçuesve në SHBA për të rritur konkurrencën me Kinën.
Ndërkaq, Japonia po i jep një prodhuesi të madh amerikan të çipave një subvencion prej mbi 325 milionë euro për të mbështetur planin e tyre për prodhimin e çipave të memories në një fabrikë në Hiroshima. Këtë ka bërë të ditur ministri japonez i tregtisë. Njoftimi për subvencionimin e “Micron Technology” vjen në prag të vizitës në Japoni të zëvendës/presidentes të SHBA-ve Kamala Harris, teksa të 2 vendet përforcojnë bashkëpunimin mbi zgjerimin e zinxhirëve të prodhimit dhe furnizimit për materialet e shumë kërkuara.
Rikujtojmë gjithashtu se biznesi i prodhimit të çipave të Samsung Electronics ka njoftuar planet për më shumë se trefishimin e kapacitetit të tij të prodhimit të çipave deri në vitin 2027 për të përmbushur kërkesat e shumta. Sipas mediave të huaja, fabrika e dytë më e madhe në botë pas Taiwan Semiconductor Manufacturing Co synon prodhimin masiv të çipave të teknologjisë së avancuar 2 nanometër deri në vitin 2025 dhe çipave 1.4 nm deri në vitin 2027.