Bota

25 vite regres në kohë! Pandemia rrezikon barazinë gjinore?!

25 vite të arritjeve në fushën e barazisë gjinore, pandemia e koronavirusit rrezikon t’i zhdukë. Kështu ka deklaruar Agjencia e Kombeve të Bashkuara, “UN Women”. “Gjithçka për të cilën kemi punuar, e që ka marrë 25 vjet, mund të humbasë brenda një viti”,-thotë zëvendës/drejtoresha ekzekutive e “UN Women”, Anita Bhatia.

“Gratë po bëjnë punë shtëpiake dhe kujdes familjar dukshëm më shumë, për shkak të ndikimit të pandemisë. Mundësitë e punësimit dhe arsimit mund të humbin, dhe gratë mund të vuajnë nga një shëndet më i dobët mendor dhe fizik. Barra e kujdesit që ka rënë mbi gratë, paraqet një “rrezik real për t’u rikthyer në stereotipat gjinorë të viteve 1950”- thotë zonja Bhatia.

Edhe para pandemisë, janë bërë vlerësime në bazë të të cilave gratë po bënin rreth tre të katërtat e 16 miliardë orëve të punës së papaguara, që bëhen çdo ditë në të gjithë botën. Me fjalë të tjera, para koronavirusit, për çdo një orë punë të papaguar të bërë nga burrat, tre orë bëheshin nga gratë. Tani kjo shifër është më e lartë.

Nëse ka qenë tre herë më shumë se burrat para pandemisë, unë ju siguroj që numri të paktën është dyfishuar“, thotë Bhatia. Megjithëse 38 hulumtimet e kryera nga “UN Women” kryesisht u përqëndruan në vendet me të ardhura të ulëta dhe të mesme, të dhënat nga vendet më të industrializuara tregojnë një pamje të ngjashme. “Më alarmante është fakti që shumë gra në të vërtetë nuk po i rikthehen punës”,-tha Bhatia.

“Vetëm në muajin shtator në SHBA rreth 865,000 gra u larguan nga tregu i punës krahasuar me 200,000 burra, dhe kjo në masë të madhe mund të shpjegohet me faktin se barra e kujdesit ka rënë mbi ato, pasi nuk kishte askush tjetër përreth”, shtoi zyrtarja e OKB-së. “UN Women” paralajmëron se efekti nga të paturit më pak gra si fuqi punëtore do të jetë i tmerrshëm jo vetëm në mirëqenien e grave, por edhe në përparimin dhe pavarësinë e tyre ekonomike.