Rajoni

7 sirianë humbin jetën në aksident në Hungari; viktima të trafikimit

Shtatë persona humbën jetën dhe katër u lënduan pasi një makinë me targa serbe, në të cilën ndodheshin refugjatë e emigrantë, u përplas në një shtëpi në Hungari.

Aksidenti ndodhi më 13 dhjetor, pasi drejtuesi i automjetit refuzoi të ndalet për kontrolle rutinore, njoftoi policia hungareze.

Shoferi dalloi që policia është duke kontrolluar veturat në fshatin, Morahalom afër kufirit me Serbinë dhe tentoi të shmang patrullën, njoftoi policia, raporton agjencia Reuters.

Vetura në të cilën ndodheshin 10 persona, u nis në drejtim të qytetit Segedin dhe si pasojë e shpejtësisë së madhe, goditi shtëpinë dhe u rrotullua.

Policia njoftoi se shoferi, i cili po ashtu u lëndua në aksident, u arrestua dhe ndaj tij do të fillojnë procedurat penale.

Ai pritet të akuzohet për tregti me qenie njerëzore dhe shkaktim të aksidentit me fatalitet.

E ashtuquajtura, Rruga ballkanike, drejt shteteve më të pasura të Bashkimit Evropian vazhdon të shfrytëzohet nga refugjatët dhe migrantët, të cilët i ikin konfliktit, luftës, vështirësive ekonomike apo përndjekjes në vendet e tyre.

Numri i migrantëve, të cilët hyjnë në Bashkimin Evropian duke kaluar kah shtetet e Ballkanit Perëndimor, pothuajse është dyfishuar gjatë këtij viti, njoftoi në gusht, Agjencia evropiane për kontrollimin e kufijve, Frontex.

Shumica e emigrantëve vijnë nga Siria dhe Afganistani.