Agjencia Europiane e Barnave (EMA) njoftoi sot se varianti “Delta” i koronavirusit do të përfaqësojë 90% të infektimeve në Bashkimin Europian deri në fund të gushtit dhe se dy dozat e vaksinës kundër COVID-19 janë të nevojshme për t’u mbrojtur nga ky variant që po përhapet me shpejtësi.
“EMA” tha se të dhënat tregojnë se “Delta” është 40% deri 60% më ngjitës. Për më tepër, varianti “Delta” mund të shoqërohet me një rrezik më të lartë të shtrimit në spital. Kjo, vijon më tej “EMA” e bën të domosdoshme që vendet të përshpejtojnë programet e vaksinimit, përfshirë dozat e dyta për të mbyllur boshllëqet imune.
Por a do të kemi nevojë për një dozë të tretë?
Sipas “EMA”-s tani është shumë herët për të gjykuar nëse dhe kur do të nevojitet një dozë përforcuese kundër COVID-19, pasi nuk ka ende të dhëna të mjaftueshme nga vaksinimi duke marrë parasysh përhapjen e mutacioneve. Sidoqoftë, në rast se nevojiten doza të treta, EMA thotë se “çdo informacion i ri i disponueshëm për këtë temë do të shqyrtohet menjëherë”.
