Aleatët e Partisë Demokratike i kërkoi lidershipit të PD që kandidati për zgjedhjet vendore të vitit të ardhshëm të shkoj përtej propozimeve partiake. Dashamir Shehi mbështet krahas primareve edhe organizimin e një sondazhi për të gjetur emra të gjithë pranuar për çdo bashki.
Fatmir Mediu dhe Dashamir Shehi janë kategorikë kur bëhet fjalë për vendimin që opozita duhet të ketë për të dalë me një kandidat.
Për Dukën nëse opozita do të dështojë njësoj si në 6 mars do të duhet që lidershipi i saj të rishikojë pozicionet në politikën aktive.
Asnjë prej aleatëve të PD nuk e shohin si shqetësim bashkëpunimin me Berishën në këto zgjedhje.
Partia Demokratike ende nuk ka zhvilluar një takim me aleatët për të konkretizuar mënyrën se si do të hyj në zgjedhjet e ardhshme vendore.
Më herët ishte kryetari i Partisë së Lirisë, Ilir Meta, që tha se opozita duhet të dalë në zgjedhjet vendore të vitit të ardhshëm me kandidatë të përbashkët.
“Kjo është më e mira për situatën, për arsye se jemi në kushtet e një shteti mafioz dhe opozita duhet të paraqitet sa më e bashkuar. Kuptohet, në kushte të tjera, sa më shumë kandidatë për qytetarët, aq më mirë do të ishte”, tha Meta gjatë një konference për mediat. “Por nuk jemi në kushte normale, demokratike, por përkundrazi, jemi në kushte kur opozitës nuk i lejohet të vonohet dhe të mos bashkohet, për interes të të gjithë qytetarëve shqiptarë”.
Ish-presidenti shtoi se Partia e Lirisë, të cilën e drejton pasi përfundoi mandatin e kreut të shtetit, është e interesuar për fitoren e opozitës.
“Pa dyshim edhe për rezultatin e saj, por këtë askush nuk e pengon, sepse rezultatet e një partie politike shihen në këshillat bashkiake, të cilët do të kthehen në parlamente shumë të fuqishme”, tha Meta.
Bashkëpunimi për zgjedhjet vendore të vitit të ardhshëm është paralajmëruar edhe nga kryetari i Partisë Demokratike, Sali Berisha. Në gusht, Berisha deklaroi se koalicion do të ketë, por do të studiohen format e tij.“Kryetari i Bashkisë në Tiranë do të dalë nga primaret. Ne nuk kemi asnjë lloj kufizimi në primare. Cilat do të jenë format e koalicionit janë për t’u studiuar, po koalicion do të ketë. Asgjë nuk pengon, nuk ka penguar dhe s’do të pengojë më këtë opozitë nga fitorja. Edi Rama do i ketë kohërat e numëruara dhe e shihni si përpëlitet”, deklaroi Berisha në atë kohë.
