Gjeneral Major Bajram Begaj tashmë që është kandidat për President Republike ka depozituar te ministri i mbrojtjes dhe të Kryeministri kërkesën për dorëheqjen nga Shefi i Shtabit të Përgjithshëm të Ushtrisë për shkak se ligji e kërkon dhe detyron që ushtarakët s’mund të zgjidhen në pozicione të rëndësishme politike.
Kryetari i grupit parlamentar socialist Taulant Balla tha se shpreson që Meta të mos i krijojë probleme me dekretimin por gjithsesi së bashku me Komisionin e Ligjeve i kanë marrë masat.
“Besoj se kjo procedurë do të përfshijë brenda orëve në vijim edhe Presidentin aktual që do të bëjë lirimin dhe kjo nuk do të jetë mendoj beteja e radhës. Por kemi menduar edhe mënyrën e zgjidhjes nëse larg qoftë na krijohet ndonjë ngërç me Presidentin”, tha Balla.
Ndërkaq, kreu në largim i shtetit Ilir Meta ndodhet për një vizitë në Turqi.
Mirmëngjes nga Stambolli, shkruan presidenti Ilir Meta, në rrjetet sociale, krahas fotos që ka shkrepur sot në Stamboll të Turqisë.
I buzëqeshur dhe me qetësinë që e karakterizon, Meta duket se do ta ndjekë nga larg procesin e votimit për Presidentin e ri, kur në kuvend pritet të depozitohet sot emri i gjeneralit Bajram Begaj, që u propozua nga socialistët një ditë më parë.
Në Turqi, një ditë më parë, presidenti Meta takoi kryetarin e bashkisë së Stambollit, Ekrem Imamoglu.
“Theksuam nevojën e forcimit të lidhjeve tradicionale historike e kulturore mes vendeve dhe qyteteve tona, si dhe shprehëm përkushtimin e përbashkët ndaj vlerave të demokracisë. E inkurajova z.Imamoglu për forcimin e lidhjeve të Stambollit me bashkitë shqiptare dhe e ftova për një vizitë të afërt në Tiranë, ftesë të cilën e mirëpriti me kënaqësi”, tha Meta pas takimit.
Në 24 korrik, Meta pritet të dorëzojë detyrën dhe me shumë mundësi, vendin e tij do ta zërë Begaj. Sot në raundin e katërt të procesin për zgjedhjen e Presidentit duhen vetëm 71 vota, që socialistët I kanë, që do të thotë se nga kjo e shtunë, vendi do të njohë kreun e ri të shtetit.
