Bota Tech

Boll u morëm me planetin Mars, tani është radha e Uranit që të eksplorohet dhe të zbulohen misteret nga NASA!

A e dini se Urani, ishte planeti i parë që u zbulua që nga antikiteti? Arritja e atëhershme  i dha astronomit William Herschel anëtarësimin në Shoqërinë Mbretërore, një titull kalorësi dhe një famë të qëndrueshme astronomike. Urani megjithëse nuk është planeti më i largët nga dielli, ai është më i ftohti i sistemit diellor. Urani është i vetmi planet që mban emrin e një perëndie greke dhe jo romake.

Pavarësisht nga këto çudira dhe ekstreme astronomike, çuditërisht pak përpjekje është bërë për të hulumtuar rreth Uranit. Vetëm në vitin 1986 është vëzhguar në kuadër të një hulumtimi, kur anija amerikane Voyager 2 kaloi në turneun e saj madhështor në sistemin diellor. Ai zbuloi një botë masive, blu të zbehtë me një atmosferë hidrogjeni, heliumi dhe metani, një familje e pasur hënash dhe një fushë magnetike të fuqishme.

Megjithatë, një vështrim i tillë sipërfaqësor do të ndryshojë. Në fillim të këtij viti, Akademia Kombëtare e Shkencave e SHBA-së publikoi një raport që i kërkoi NASA-s të niste një kërkim për Uranin si misionin e saj kryesor me prioritet më të lartë për dekadën e ardhshme. Akademia publikon një raport mbi prioritetet e SHBA-së në eksplorimin planetar çdo 10 vjet dhe çdo studim dhjetëvjeçar ka ndikim të madh – që do të thotë se Nasa tani është nën presion të madh për të hartuar dhe financuar një mision të tillë.

Shumica e ideve për misionin parashikojnë një anije kryesore që do të rrotullohet rreth Uranit dhe do të vëzhgojë planetin. Misioni do të synojë të zgjidhë shumë mistere rreth Uranit. Pse planeti është kaq i ftohtë dhe pse boshti i tij i rrotullimit është i anuar anash, pothuajse në rrafshin e orbitës së tij rreth diellit, një fenomen që do të thotë se polet e tij veriore dhe jugore shtrihen aty ku shumica e planetëve të tjerë kanë ekuatorët e tyre?