“Ndryshe” erdhi dhe nuk mund të vinte më ndryshe se kaq! Jo siç jemi mësuar ta shohim gjithmonë Salsanon dhe Adin duke intervistuar politikanë të ndryshëm, por këtë herë i drejtuan disa pyetje shumë speciale dy personazheve që ndoshta nuk jeni mësuar t’i dëgjojmë ato vetë, por muzikën e tyre prej vitesh tanimë e kemi dëgjuar në ekranin e televizionit të Top Channel.
Bëhet fjalë pikërisht për dy violinistet, Albana dhe Ines. Fillimisht, vajzat u pyetën se nëse nuk do të kishin ndjekur pasionin e tyre si violiniste, çfarë do të kishin zgjedhur të bënin tjetër.
Albana: Showgirl ose prezantuese, më ka pëlqyer gjithmonë. Kam kohë të bëhem, është ende herët.
Ines: Balerinë. Kur isha unë nuk kishte balet modern, vetëm klasik ndaj nuk e vazhdova.
E “Ndryshe” pa pak esencë politike, është si “peshku pa ujë”, ndaj nuk mund të mungonin disa pyetje paksa pikante rreth politikanëve tanë. Dy bukuroshet zgjodhën të preferuarin e tyre.
Albana: Sali Berisha është shumë karizmatik. Për sa i përket veshjes dhe stilit, Edi Rama.
Ines: Edi Rama pasi është shumë artist.
Violinistet gjithashtu “përshkruan” politikanët tanë me anë të disa tingujve që krijuan nga violina dhe që përshtateshin më shumë me karakterin e tyre.
E dukeqenëse “Big Brother VIP” është padyshim kryefjala e çdo portali dhe rrjeti social prej një muaji tanimë, nuk mund të mos i drejtoheshin vajzave disa pyetje lidhur me të.
Cili është banori i preferuar nga “Big Brother VIP”?
Albana: Ilir Shaqiri.
Ines: Ilir Shaqiri se e kam shok (qesh). Të themi atë që është, është më i rrahur me jetën.
Do të futeshit në “Big Brother VIP”?
Albana: Mua më është bërë ftesa, por nuk kam pranuar. Nuk pranova se po hyra brenda do t’i kisha “vaksinuar” të gjithë.
Ines: Jo se ne nuk na izolon dot.
Violinistet gjithashtu nuk mund të shpëtonin pa pyetjen se sa paguhen ose se cila ka qenë shuma më e madhe që kanë marrë ndonjëherë. Ato refuzuan të tregojnë një shumë, por treguan se në disa media është përfolur se janë paguar 2 mijë euro, por Albana dhe Ines e mohuan këtë gjë.