Cristiano Ronaldo ka kryesuar listën vjetore të personave të famshëm që paguhen më shumë për postime të sponsorizuara në “Instagram”. Futbollisti fiton deri në 1.6 milion dollarë (1.2 milion £) për të reklamuar një produkt në mediat e tij sociale. Kapiteni i Portugalisë, i cili tronditi sponsorin e “Euro 2020”, “Coca-Cola”, duke hequr pijet nga tavolina gjatë një konference shtypi, është kurorëzuar mbret i influencuesve në një listë që përfshin gjithashtu dhe aktorin Dwayne “The Rock” Johnson apo këngëtaren Ariana Grande.
Kjo është hera e parë që futbollisti arrin vendin e parë në renditjen vjetore, të cilat zakonisht dominohen nga të famshëm të SHBA-së nga industria e televizionit, e filmit dhe e muzikës. Shuma që Ronaldo mendohet të fitojë për një postim të sponsorizuar u rrit ndjeshëm vitin e kaluar, pothuajse dyfishuar nga 889,000 dollarë në vitin 2019. Ronaldo u zhvendos nga vendi i tretë në 2019-ën, duke kapërcyer Dwayne Johnson dhe Kylie Jenner.
36-vjeçari arrin të fitojë më shumë se 40 milion dollarë në vit nga “Instagrami”, më shumë se paga e tij si lojtar në klubin italian të Serie A, Juventus, dhe tarifa e tij e pagimit për një postim është rritur së bashku me popullaritetin që ka fituar gjatë pandemisë. Ronaldo është personi më i ndjekur në “Instagram” me më shumë se 300 milion fansa.
Një nga produktet e sponzorizuara nga Ronaldo në “Instagram” është dhe marka e shampove kundër zbokthit “Clear”, të cilën ai e promovon në reklama në televizion së bashku me postime më amatore me këshilla për ndjekësit e tij si:
Mbajtja e flokëve të rregullt më ndihmon të jem në krye të lojës.
Mike Bandar, i cili përpilon listën vjetore jozyrtare të personave më të pasur në “Instagram”, tha se:
Me fillimin e Kampionatit Europian të Futbollit “Euro 2020” dhe disa lëvizje marketingu gjatë dy javëve të fundit, Ronaldo është ngritur shumë sukseshëm. Vetëm një javë më parë ai konfirmoi statusin e ‘mbretit’ në “Instagram” pasi u bë personi më i ndjekur në këtë rrjet social.
Në listën e 10 personave më të pasur është dhe një yll tjetër futbolli, rivali kryesor i Ronaldos, Lionel Messi, i cili renditet në vendin e shtatë dhe është në gjendje të fitojë pothuajse 1.2 milion dollarë për një postim.
Më poshtë është dhe lista e plotë dhe shifrat e ‘frikshme’ të cilat fitojnë këta persona të famshëm.