Poeti më i famshëm i Italisë, Dante Alighieri u detyrua të largohej nga Firence, vendi i tij i lindjes, për shkak të bindjeve të tij politike. Ky është konkluzioni i arritur nga një grup avokatësh në maj të 2021, pavarësisht se dëbimi i poetit ndodhi 700 vite më parë.
I konsideruar si “babai i gjuhës italiane”, Dante u dëbua më 1302 më pas u dënua me vdekje pas një grusht shteti nga kundërshtarët e tij politikë dhe aleatë të Papës.
Dënimi që solli dhe largimin e tij u dërgua për rishikim gjatë së premtes në Firence, si pjesë e një nisme për 700 vjetorin e vdekjes së poetit.
“Firence gjithmonë është ndjerë deri diku fajtore për atë që i bëri një prej qytetarëve të saj më të famshëm”, tha për Euroneës, Sperello di Serego Alighieri, pasardhësi i poetit.
“Kjo çoi drejt një sërë përpjekjesh për të ndrequr atë që bënë asokohe dhe kjo ishte pjesë e tyre”, shtoi ai.
Autori i Komedisë Hyjnore vdiq në Ravena më 1321 dhe shpesh kërkoi të kthehej në vendlindje, por nuk ia doli dot.
“Trupi i tij mbeti në Ravena dhe Firence është munduar gjithmonë që ta kthejë”, tha pasardhësi i Dantes. “Unë mendoj se ato duhet të qëndrojnë atje, përderisa ai vdiq aty”.
Kryevepra e Dantes përfundoi vetëm një vit përpara vdekjes së tij dhe e çon lexuesin në një rrugëtim mbresëlënës përmes ferrit, purgatorit dhe parajsës.
Kritiku letrar amerikan Harold Bloom ka shkruar thellësisht mbi veprën e Dantes.
“Dy poetët më të rëndësishëm evropianë duhet të jenë Dante dhe Shekspiri”, nënvizoi ai në librin e tij të fundit.