Këngëtarja e famshme shqiptare Besa Kokëdhima, ishte sot në linjë telefonike në Top Albania Radio. Edhe pse nga larg Besa i dha shumë energji pozitive studios ashtu siç di vetëm ajo. Në emisionin “Pardon my French” me prezantuese Jonida Aliçkolli, Besa ndau disa momente shumë interesante rreth familjes, jetës së saj private dhe karrierës profesionale. Gjatë intervistës ajo shprehu me gjithë shpirt dashurinë e madhe për familjen dhe vendlindjen. Por Jonida e ngacmon pak duke e pyetur për jetën e saj private nëse është “Dashuria” ajo që e kthen në Shqipëri apo ajo që e mban atë në Francë. B esa me gjithë pozitivitetin që e karakterizon ka kthyer menjëherë përgjigjen e saj duke u shprehur: “E kam të pamundur të rri larg Shqipërisë. Pavarësisht se kam një shtëpi me qera në Paris, po kaloj gjysmën e vitit në Shqipëri, duke bërë shpesh vajtje-ardhje. Realisht njerëzit e zemrës i kam në Shqipëri, më merr shumë malli për ata sepse i dua shumë. E dua shumë vendin tim me të gjitha problemet që ka. Sa herë që vi në Shqipëri jam shumë e lumtur ditët e para, deri në momentin që disa gjëra që ndodhin aty më irritojnë, kështu që nuk e duroj dot presionin dhe largohem.” Gjithashtu Besa rrëfen për dëgjuesit e Top Albania Radio-s një ndër këngët e saj më të preferuara, e cila është “Engjëjt vrasin njëlloj.” Kjo këngë na kthen 7 vite pas dhe ende mbetet e paharrueshme për të gjithë.