Një nga aeroportet me fluksin më të madh të fluturimeve në Evropë ai i Stambollit ka pezulluar fluturimet prej një stuhie të rëndë dëbore që ka mbuluar qytetin më të madh të Turqisë, si dhe Evropën juglindore.
Mbyllja e aeroportit të Stambollit, ku një nga terminalet u shemb prej peshës së dëborës, ka ndaluar fluturimet nga Lindja e Mesme dhe Afrika drejt Evropës e Azisë.
Zyrtarët thanë për rrjetin AFP se kjo është mbyllja e parë në aeroportin e ri modern që zëvendësoi më të vjetrin “Ataturk Airport” në 2019.
Ndërkohë dëbora e parë krijoi një atmosferë festive në sheshet e xhamitë e Stambollit, ku fëmijët përfituan më shumë ndërsa turistët bënin foto.
Ndalesat e fluturimeve kanë krijuar probleme për 16 milionë banorët e qytetit më të madh të vendit, ndërsa makinat përplaseshin me njëra-tjetrën në rrugë e autostrada.
Qendrat tregtare u mbyllën më herët ndërsa shpërndarjet e ushqimeve janë pezulluar, përveç shitësve ambulantë të “simiteve” që qëndronin në të zbrazura në dëborë.
Greqi
Reshjet e dendura të dëborës dhe ulja e temperaturave kanë sjellë probleme të shumta në Greqi, ku qeveria ka nxjerrë në rrugë ushtrinë për të ndihmuar në hapjen e rrugëve dhe largimin e mijëra automjeteve të bllokuara në akset e periferisë të Athinës.
Ndonëse autoritetet kishin paralajmëruar banorët që të shmangin lëvizjet e panevojshme,sërish mijëra grekë dolën në rrugë me automjetet e tyre por pa zinxhirë ose goma dimërore, duke krijuar kaos në trafik.
Më herët ministri i emergjencave civile Kristos Stilianidhis, tha se pritet një natë e vështirë në zonën e Atikës, Evias dhe ishujve të Egjeut.
Ministria e mbrojtjes dërgoi qindra forca ushtarake për të çbllokuar arteriet kryesore, ndërsa mbrojta civile u bëri apel banorëve të qëndrojnë në shtepi pasi edhe gjatë 24 orëve të ardhshme situata pritet të jetë e njëjtë.
Autoritet vendosën që të martën të jenë të mbyllura të gjitha bizneset e zonave të prekura, ndërsa janë vënë në gadishmëri të plotë gjithë mekanizmat shtetëror.
Në Athinë u mbyllën shkollat zyra dhe institucione. Qeveria greke u ka bërë me dije punonjësve të administratës publike se për shkak të situatës së rënduar mund të mos shkojnë në punë gjatë ditës së martë.