Nëse mendoni të ndryshoni punë apo të lëvizni, së pari vëzhgoni distancën që do t’ju duhet të udhëtoni për të arritur në zyrë, sepse nuk janë vetëm punët e ulura që na shkaktojnë probleme shëndetësore, por edhe ato që na detyrojnë të udhëtojmë. Në këtë përfundim ka arritur një studim suedez i cili hetoi korrelacionin midis distancës shtëpi-zyrë dhe stilit të jetesës. Sipas studimit sa më shumë të rritet distanca për të shkuar në punë, aq më shumë rritet rreziku për të qenë mbipeshë, për të qenë nën stres dhe për të fjetur keq.
Hulumtimi hetoi efektet e udhëtimit për në punë në shëndet me ndihmën e të dhënave të mbledhura nga Sondazhi Longitudinal Suedez i Shëndetit midis 2012 dhe 2018. Studiuesit ekzaminuan përgjigjet e rreth 13,000 burrave dhe grave të moshës 16 deri në 64-vjeç në një sërë temash si stili i jetesës pra nëse bënin aktivitet fizik, pinin alkool apo duhan, llojin e punës dhe nëse vuanin nga sëmundje kronike, stresi dhe depresioni.
Studimi tregoi se kur distanca shtëpi-zyrë i kalonte tre kilometra, udhëtarët kishin probleme me mbipeshën, ishin më të stresuar dhe kishin mungesë gjumi. Akoma më të rrezikuar ishin ata që punonin më shumë se 40 orë dhe udhëtonin më shumë se pesë orë në javë sesa ata që udhëtonin një deri në pesë orë në javë.
Punëtorët që udhëtonin më pak se tre kilometra ishin më aktivë fizikisht, ndoshta sepse distanca më e shkurtër e përshkuar e bënte më të lehtë ecjen në këmbë ose me biçikletë për në punë, ose gjithashtu sepse një udhëtim më i shkurtër u jep atyre më shumë kohë të lirë për të praktikuar një sport. Nëse jeni gjithmonë vonë dhe nxitoni për të kapur autobusin pothuajse çdo ditë, kemi një lajm të mirë për ju. Studimi i ri tregon se edhe këto pak minuta aktivitet fizik të fuqishëm mund të kontribuojnë në jetëgjatësinë tuaj.
