Dolce & Gabbana i është bashkuar një liste në rritje të shtëpive të modës për të ndaluar gëzofin e kafshëve, duke njoftuar të hënën se do të përdorë një “eko-material” të qëndrueshëm në koleksionet e ardhshme. Në një deklaratë të përbashkët me grupin për të drejtat e kafshëve “Humane Society International”, marka italiane tha se do të heqë gradualisht gëzofin nga ky vit.
Megjithatë, ajo do të vazhdojë të punojë me “mjeshtëri të gëzofit” për të krijuar “një alternativë të qëndrueshme të leshit artificial që përdor materiale të riciklueshme”. Zyrtari i komunikimit dhe marketingut të grupit, Fedele Usai, në një deklaratë për shtyp tha se:
Dolce & Gabbana po punon drejt një të ardhmeje më të qëndrueshme që nuk mund të mendojë për përdorimin e gëzofit të kafshëve. I gjithë sistemi i modës ka një ndikim të rëndësishëm social, rolin e përgjegjësisë që duhet promovuar dhe inkurajuar.
Me kompani si Chanel, Prada dhe Burberry që kanë bërë premtime të ngjashme në vitet e fundit, D&G është përballur me thirrje në rritje për të ndaluar gëzofin e kafshëve, duke përfshirë lëkurën e dhelprës dhe të vizonit nga koleksionet e saj. Grupi i fushatës “People for Ethical Treatment of Animals (PETA)”, i cili ka organizuar protesta të profilit të lartë brenda dhe jashtë disa prej dyqaneve të markës, e përshëndeti vendimin e së hënës si “të dhembshur dhe mendjemprehtë për biznesin”. Organizata për të drejtat e kafshëve tha se kishte marrë emaile rreth D&G nga mbi 300,000 mbështetës në më shumë se dy dekada fushate.
D&G nuk zbuloi detaje të mëtejshme se si ose nga çfarë materialesh do të prodhohet leshi i saj artificial, por tha se politika e saj e re përmbush udhëzimet e përshkruara nga “Fur Free Alliance”, një grup organizatash për mbrojtjen e kafshëve. Në një deklaratë për shtyp, kryetari i “Fur Free Alliance” Joh Vinding përgëzoi D&G për “përfundimin e lidhjes së saj me mizorinë e gëzofit dhe kalimin në materiale më humane dhe novatore”.
