Kryetari i Partisë Agrare Ambientaliste, Agron Duka, ishte sonte i ftuar në emisionin sportiv “Paso” me Denis Dyrnjaja dhe Glenti Nallbani.
Në një intervistë për Top Albania Radio, Duka rrëfen të shkuarën e tij si volejbollist, edhe pse e merr malli nga pak, ai mendon se çdo gjë duhet përshtatur me moshën. Përposë të shkuarës si volejbollist dhe të tashmes në karrigen e një politikani, ai ende mbetet një mburojë, kur bëhet fjalë për sportin.
Ndërsa folën për sportin, në veçanti volejbollin, Duka thekson se mazhoranca, pra Edi Rama, duhej të bënte më shumë, duhen sakrifikuar disa para nga buxheti i shtetit sepse në këtë fushë ne nuk mund të krahasohemi as me vendet fqinje. Madje ai e krahason me zero nivelin e ambienteve sportive në vend.
Ne e kemi të vështirë të mbijetojmë nëse nuk ndryshon ligji për sportin. Besoj se janë duke u marrë me ato punë, ka qenë iniciativë edhe e tij (Edi Rama), por fatkeqësisht nuk ka ndodhur gjë, ka qenë premtim elektoral.
Në fushatën elektorale të 2013-ës, këto që janë sot të mazhorancës, premtuan… zotuan që sporti do ketë një ministri më vete ose një komitet sportesh, i cili do të kishte rolin e një ministrie, por nuk e realizuan.
Faktikisht rrezikohet shumë ecuria e këtyre sporteve nëse nuk vihet dorë në ligjin për sportin.
