Në fshatin Shtaval në komunën serbe të Sijenicës, po kryhen gërmime pas dyshimeve mbi një varrezë masive me trupa të shqiptarëve të vrarë gjatë luftës në Kosovë. Lajmin e konfirmoi edhe Prishtina zyrtare:
Gërmimet filluan pasi në fund të javës së kaluar, përmes Komitetit Ndërkombëtar të Kryqit të Kuq u siguruan imazhet satelitore, të cilat ditët në vijim do të analizohen nga ekspertët, për të saktësuar vendndodhjen e varrezës masive. Ekspertët mjeko-ligjorë të Republikës së Kosovës do të vazhdojnë të qëndrojnë atje, për të ndjekur gërmimet.
Urdhrin për nisjen e tyre e dha Prokuroria e Krimeve të Luftës në Serbi.
Kërkimi në terren është i nevojshëm për të përcaktuar me saktësi fatin e personave të zhdukur, çka u dërgon mesazh të qartë familjeve të tyre se autoritetet serbe po verifikojnë informacionet.
Ishte Komisioni Qeveritar i Kosovës për Personat e Zhdukur që fillimisht ofroi informacione mbi dyshimet për varrezën masive. Autoritet serbe thanë se kërkimi në terren do të zgjasë deri në përcaktimin dhe sqarimin e fakteve të nevojshme për të përcaktuar vendndodhjen e saktë.
Më 27 prill, në një deklaratë për Radion Evropa e Lirë, Andin Hoti, drejtues i Komisionit Qeveritar për Personat e Zhdukur në Kosovë, akuzoi palën serbe se nuk ofron të dhëna për zbardhjen e fatit të personave të pagjetur. Sipas tij, “Beogradi ende vazhdon “lojën”, duke mos dhënë informacione”.
Vazhdimisht, zyrtarët kosovarë kanë ngritur dyshime për ekzistencën e një varreze masive në fshatin Shtaval të Serbisë. Këto dyshime u përforcuan edhe më shumë kur në Kizhevak, në komunën e Rashkës pranë kufirit me Kosovën, më 16 nëntor 2020 u gjetën eshtrat e një numri të civilëve shqiptarë të vrarë gjatë luftës, së viteve ‘98-99. Referuar të dhënave të organizatave joqeveritare, në varrezat masive në Serbi janë gjetur trupat e rreth 1 mijë kosovarëve të vrarë. Afro 1 mijë e 600 persona të tjerë ende rezultojnë të zhdukur në Kosovë, kryesisht nga komuniteti shqiptar.