Bota

Edhe Finlanda ndalon vizat për rusët!

Që nga 30 shtatori, pra sot, shtetasit rusë me viza turistike nuk do të mund të hyjnë në Finlandë. Kështu, ky shtet i bashkohet Polonisë, Estonisë, Letonisë dhe Lituanisë, që nga 19 shtatori mbyllën kufijtë e tyre për shumicën e qytetarëve rusë.

Shtetasit rusë me vizë Shengen, të cilët duan të lëvizin për qëllime turizmi, biznesi, sporti ose kulturore, nuk do të mund të hyjnë në territoret e këtyre vendeve. Shtetet që ndajnë kufirin me Rusinë – vendet baltike, Polonia dhe Finlanda – kanë bërë thirrje të parat për masa kufizuese në vizat turistike për rusët. Këto ndalime pasojnë sanksionet e shumta të ndërmarra kundër Rusisë, si përgjigje ndaj pushtimit të Ukrainës, i cili nisi më 24 shkurt.

Ministri i Jashtëm, Pekka Haavisto, tha se vendimi synon të parandalojë plotësisht turizmin rus në Finlandë dhe rrugën transit përmes këtij vendi. Qeveria e arsyetoi vendimin duke përmendur shqetësimet e sigurisë në lidhje me luftën e Rusisë në Ukrainë, referendumet “ilegale” të organizuara nga Rusia në katër rajone të Ukrainës, dhe atë që tha se ishte sabotim për dëmet e pësuara nga tubacionet Nord Stream në Detin Baltik.

Finlanda vetëm e kishte ulur numrin e vizave të lëshuara për qytetarët rusë në një të dhjetën e numrit të zakonshëm, para luftës, në shenjë solidariteti me Ukrainën.

Por, deri në këtë vendim ajo ishte një nga rrugët e fundit tokësore lehtësisht të qasshme për në Evropë për turistët rusë drejt zonës Shengen.
Më 31 gusht, Bashkimi Europian pezulloi marrëveshjen për viza me Rusinë si një “hap i parë i domosdoshëm”.

Për pasojë, rusët do ta kenë më të vështirë sigurimin e një vize dhe procesi do t’iu kushtojë më shtrenjtë. Vendet e BE-së nuk kanë arritur të pajtohen për një ndalesë totale për vizat turistike për rusët, meqë vendet anëtare janë të ndara në këtë çështje. Kievi i ka bërë thirrje BE-së që të ndalojë lëshimin e vizave për të gjithë rusët, përveç disidentëve politikë.