Kupa e Shqipërisë mbylli fazën çerekfinale për ndeshjet e kthimit. Sot në 13:00 në Laç, vendasit humbën 0-3 me Egnatian. Për herë të parë në histori, rrogozhinasit kalojnë në fazën gjysmëfinale të Kupës së Shqipërisë. Pas ndeshjes, trajneri i Laçit, Gentian Mezani ka folur për largimin nga ekipi. Po sot, në 17:00 Partizani fitoi 1-0 me Vllazninë, teksa shkodranët kalojnë më tej pasi fituan 3-1 në ndeshjen e parë. Dje në fazën gjysmëfinale të Kupës u kualifikuan Tirana dhe Teuta. Kështu, Egnatia, Vllaznia, Tirana dhe Teuta do mësojnë rivalët në shortin e FSHF-së.
Në stadiumin e Laçit, vendasit e Gentian Mezanit humbën 0-3 me Egnatian në fazën çerekfinale për ndeshjen e kthimit në Kupën e Shqipërisë. Për herë të parë në histori, Egnatia e drejtuar nga Edlir Tetova merr një biletë për në fazën gjysmëfinale. Dueli u hap në minutën e 20-të nga Fernando, me sferën që përfundoi pas krahëve të Selmanit edhe pas devijimit të mbrojtjes. Pjesa e dytë ishte me të njëjtin ton, teksa Redi Kasa shënoi një gol të bukur në të 54 minutë. Kur pritej reagimi i Laçit, miqtë shënuan golin e tretë. Edhe këtë herë u kujdes Fernando në të 66 minutë për dopietën personale. Tanimë Laçi është jashtë Kupës, teksa prej fillimit të shkurtit nuk ia del të fitojë. Ndeshja e parë mes tyre në Rrogozhinë përfundoi 0-0. Pas ndeshjes, trajneri i Laçit, Gentian Mezani ka folur për largimin nga ekipi.
