Bota

EMA pritet të vlerësojë vaksinën “Johnson&Johnson”

Agjencia Europiane e Medikamenteve (EMA) pritet të publikojë rekomandimin mbi përdorimin e vaksinës anti-COVID “Johnson & Johnson”.

Pas vaksinimit me të, në Amerikë u evidentuan 6 raste të mpiksjes së gjakut ndonëse shumë të rralla. Eshtë fjala për të trombozës së sinusit venoz cerebral, në kombinim me nivele të ulëta të trombociteve të gjakut.

Një javë më parë, kompania “Johnson & Johnson” filloi dërgimin e vaksinave në vendet e Bashkimit Europian.

Paraprakisht, EMA tha se “vaksina mund të përdoret pa kufizime” dhe se “përfitimet në parandalimin e COVID-19/ës tejkalojnë rreziqet e efekteve anësore”. Rregullatorët amerikanë pezulluan përdorimin e vaksinës monodozë, një javë më parë pasi rreth 6.8 milionë njerëz e injektuan.

Javë më parë, shqetësime të ngjashme pati edhe me vaksinën e “AstraZeneca”-s që gjithashtu përdoret në Shqipëri. Kjo pas raportimeve të rasteve të trombozave. Një gjë e tillë çoi në pezullim nga shumë vende europiane ndërsa rregullatori europian e autoritetet shëndetësore në Britaninë e Madhe jepnin garanci mbi sigurinë dhe efikasitetin e saj. Përfitimet u vlerësuan shumë më të larta se risqet.