Republika Islamike liron përkohësisht nga burgu regjisorin iranian Jafar Panahi. Vendimi vjen disa ditë pasi Panahi hyri në një grevë urie për të protestuar kundër asaj që e cilëson “sjellje çnjerëzore” e gjyqësorit dhe sigurisë në Iran. Në një deklaratë të publikuar në faqen e Instagramit të bashkëshortes së regjisorit, thuhet:
Sot, në ditën e tretë të grevës së urisë së Jafar Panahit, ai u lirua përkohësisht nga burgu pas përpjekjeve të familjes së tij, avokatëve të respektuar dhe kolegëve.
Po përmes këtij postimi u bë e ditur se të tjera detaje për lirimin e njeriut të kinematografisë do të jepen nga ekipi ligjor që e përfaqëson. Po ashtu, konfirmimi për lënien të lirë erdhi edhe nga Qendra për të Drejtat e Njeriut në Iran (CHRI) me seli në Shtetet e Bashkuara të Amerikës.
Kujtojmë se pak para se të prangosej, Jafar Panahi nënshkroi një letër të hapur e së bashku me më shumë se 300 regjisorë iranianë, u bënte thirrje forcave të sigurisë në Iran që t’i jepnin fund shtypjes së dhunshme së protestuesve.
Qeveria iraniane ka reaguar brutalisht ndaj protestave të qytetarëve, të nxitura nga vdekja e 22-vjeçares Mahsa Amini kurdo-iranianes e cila në shtator të vitit të kaluar u ndalua nga Policia e Moralit me pretendimin se nuk e mbante siç duhet shaminë e kokës. Më 16 shtator ndërroi jetë në një spital në Teheran e sipas familjarëve shkak u bë dhuna policore. Por, autoritetet i hedhin poshtë akuzat.
Të paktën 522 persona janë vrarë përgjatë katër muajve të protestave kundër Qeverisë së Iranit, sipas raportimeve të organizatës HRANA me seli në Shtetet e Bashkuara të Amerikës. Në mesin e viktimave janë 70 fëmijë e 68 zyrtarë policorë, referuar shifrave të dhëna nga organizata rreth një javë më parë. Gati 20 mijë persona u arrestuan, por 110 nga ata përballen me akuza që mund të çojnë në dënimin e tyre me vdekje.
