Rusia ka njoftuar për dëbimin e shtatë personave nga Ambasada e Danimarkës në Moskë, duke iu kundërpërgjigjur një vendimi të ngjashëm të Kopenhagës.
“Ata duhet të largohen nga shteti brenda dy javësh”, tha Ministria e Jashtme ruse përmes një deklarate më 5 maj.
Ky njoftim i Rusisë vjen pikërisht një muaj pasi Danimarka dëboi 15 punonjës të Ambasadës ruse në Kopenhagë, duke thënë se dëbimi i tyre do të dërgonte “një sinjal të qartë në Moskë se ne nuk do të pranojmë që zyrtarët e inteligjencës ruse të spiunojnë në tokën daneze”.
Ministria e Jashtme ruse tha po ashtu se ia ka refuzuar kërkesën për vizë një diplomati të Danimarkës dhe se “rezervojmë të drejtën për të ndërmarrë hapa të tjerë hakmarrës kundër veprimeve jomiqësore të Danimarkës, të cilat do t’i bëhen publike palës daneze”.
Shtetet evropiane dhe aleatët perëndimorë kanë dëbuar diplomatë rusë dhe punonjës të ambasadave, qëkur Moska ka nisur pushtimin e paprovokuar të Ukrainës më 24 shkurt.
Danimarka vendosi të dëbojë 15 diplomatë rusë pas raportimeve për gjetjen e varreve masive dhe vrasjeve të civilëve në qytetin ukrainas Bucha, tha të martën ministri i Jashtëm danez Jeppe Kofod. Më herët edhe Franca ka vendosur të dëbojë 35 diplomatë rusë. Bëhet me dije se aktivitet e tyre janë në kundërshtim me interesat e sigurisë së Francës. “Franca vendosi të dëbojë një numër të madh të personelit rus që kanë status diplomatik në Francë”, njoftoi Ministria e Jashtme Franceze.
