Në Kosovë është ditë zie kombëtare, në nderim të 10 viktimave të aksidentit të djeshëm në Kroaci ku një autobus që udhëtonte nga Frankfurti në Prishtinë doli nga rruga dhe u përmbys. Sot lënë spitalet kroate mbi 20 nga kosovarët e plagosur në Sllavonski Brod.
8 prej viktimave u identifikuan. Ndërkaq, dy vetë ende janë në rrezik për jetën e gjenden në terapi intensive. Në Kroaci vijojnë të qëndrojnë ministrat e Brendshëm e të Shëndetësisë të Kosovës: Xhelal Sveçla e Arben Vitia. Dje ishte edhe kryeministri Albin Kurti.
Ministri Xhelal Sveçla deklaroi se me autoritetet kroate po organizojnë transportin e të plagosurve, duke kthyer në Kosovë e në Gjermani, ata që nuk kanë lëndime serioze.
I pyetur nëse shoferi i arrestuar do të ekstradohet në Kosovë, Sveçla u shpreh se presin të gjejnë zgjidhje.
52-vjeçari pranoi se ishte i përgjumur në timon. Ai është shtetas i Kosovës por në Kroaci rrezikon deri në 15 vjet burg nëse shpallet fajtor si shkaktar aksidenti. Në autobusin e rrëzuar udhëtonin 67 pasagjerë e dy shoferë, njëri prej të cilëve gjeti vdekjen.
