Pas një vizite të papritur në Kiev, kryeministri britanik Boris Johnson tha se “Perëndimi duhet të vazhdojë të mbështesë ukrainasit, ndërsa ata luftojne për të rimarrë territorin e pushtuar nga Rusia”.
Do të ishte një katastrofë, nëse presidenti rus Vladimir Putin mund të pretendonte fitoren. Ukraina nuk duhet të nxitet për të pranuar një “paqe të keqe”, e që thjesht do të ishte preludi i një ofensive të përtërirë ruse.
Gjithashtu, shefi i qeverisë së Londrës mbrojti vendimin e tij për t’u tërhequr nga një konferencë e konservatorëve veriorë të premten, në mënyrë që të mund të takohej me presidentin ukrainas, Volodymyr Zelensky.
Ishte e rëndësishme të demonstrohej mbështetja e Britanisë së Madhe në një kohë kur ukrainasit po vuajnë tmerrësisht përballë ofensivës së vazhdueshme ruse, në Donbas.
Mendoj se është shumë e rëndësishme të shkosh në Ukrainë në një kohë veçanërisht kritike. Shqetësimi ynë është se lodhja e Ukrainës ka filluar të shfaqet në mbarë botën. Eshtë shumë e rëndësishme të tregojmë se jemi pranë tyre për një kohë të gjatë dhe po u japim qëndrueshmërinë strategjike që u nevojitet.
Në bisedimet me presidentin Zelensky, Johnson deklaroi se “Britania e Madhe është e gatshme të trajnojë qindra mijëra trupa ukrainase teksa ata vazhdojnë të luftojnë kundër rusëve”.
Shtabi i Përgjithshëm i Forcave të Armatosura Ukrainase njoftoi sot se “trupat ruse po përqendrojnë përpjekjet kryesore në drejtim të Severodonjeckut dhe Bakhmutit”.
Trupat ruse po bombardojnë pozicionet e forcave ukrainase dhe infrastrukturën civile në zonën e qytetit Lisiçansk, ngjitur me Severodonjeckun, si dhe vendbanime të tjera. Këtë e bëjnë me artileri topash e sisteme raketash me shumë lëshime. Rusia po përpiqet të kontrollojë edhe Sllavianskun.
Sekretari i Përgjithshëm i NATO-s, Jens Stoltenberg paralajmëroi se “lufta në Ukrainë mund të vazhdojë me vite” e kërkoi furnizime me armë të fundit për Kievin, edhe nëse “kostot janë të larta”.