Kryeministri Edi Rama reagoi sot rreth një artikulli të publikuar nga “Der Standard” në lidhje me hartën për kufirin mes Serbisë dhe Kosovës.
Rama e cilësoi të rremë, lajmin e shpërndarë nga “Der Standard”, ndërkohë që theksoi se asnjëherë nuk ka mbështetur rishikim kufijsh mes Serbisë dhe Kosovës.
“derStandardat @webstandardat: Çfarë zhgënjimi të shikosh një gazetë me emër aq të madh të sillet si shpërndarës lajmesh të rreme! Unë nuk jam shprehur kurrë, as për një dokument jozyrtar “non-paper”, as për një hartë dhe kurrë nuk kam mbështetur ndonjë rishikim kufijsh përgjatë vijave etnike mes Serbisë dhe Kosovës. E turpshme!
.@derStandardat @webstandardat what a disappointement to see such a highly reputated paper behave like a fake news spreader! I have never said any of it about "non paper&map" and I have never ever endorsed any border drawing along ethnic lines between SRB&KOS! #Embarrassing
— Edi Rama (@ediramaal) May 3, 2021
Në shkrimin ku fliste për ndryshimin e kufijve në Ballkan, gazeta austriake pretendon se kryeministri Rama konfirmoi ekzistencën e një dokumenti të tillë.
Nëse ndiqni argumentet e zyrës së Jançës, dokumenti nuk ekziston fare, por në të njëjtën kohë në zyrën qeveritare në Lubjanë pretendohet se vinte nga opozita e majtë në Slloveni. Kështu që mbetet e paqartë se si një letër që as nuk ekziston mund të vijë nga opozita. Çështja mbetet e paqartë. Të tjerët tashmë kanë konfirmuar ekzistencën e ‘non-paper’. Kryeministri shqiptar Edi Rama i tha medias shqiptare se ai kishte parë dokumentin dhe hartën me ndryshimet e propozuara të kufirit. Vetë Rama, së bashku me Vuçiç, miratuan vizatimin e kufijve përgjatë vijave etnike midis Kosovës dhe Serbisë tre vjet më parë.
Mediat sllovene publikuan një dokument “non-paper”, që u tha se kryeministri slloven, Janez Jansha, i ka dërguar Këshillit Europian. Në këtë dokument flitej lidhur me propozimin e supozuar të Janshës për ricaktimin e kufijve në Ballkanin Perëndimor, si një mënyrë për të zgjidhur problemin kronik ndërmjet gjashtë vendeve në rajon. Sipas përmbajtjes që u publikua në media, bëhet fjalë për ricaktimin e kufirit të Kosovës dhe Serbisë, si dhe parashikohet mundësia e shkëputjes së entitetit të Republikës Serbe nga Bosnje e Hercegovina, bashkimi i pjesëve me shumicë shqiptare të Malit të Zi dhe Maqedonisë së Veriut me Shqipërinë, si dhe bashkimi i një pjese të Bosnje e Hercegovinës, pra, Hercegovinës perëndimore me Kroacinë.
