Lëvizja për Liri e biznesmenit liberal, Robert Golob, ka shënuar fitore ndaj tri herë kryeministrit Janez Jansha dhe Partisë Demokratike Sllovene që ai udhëheq.
Golob, partia e të cilit është themeluar në muajin janar, ka fituar 34.5 për qind të votave në zgjedhjet e 24 prillit, në krahasim me partinë e Janshas që ka fituar 23.5 për qind të votave, sipas Komisionit Shtetëror të Zgjedhjeve, i cili ka numëruar 98 për qind të votave.
Vetëm tri parti tjera, ajo konservatore, Sllovenia e Re, Social-Demokratët dhe e majta, Levica, kanë marrë më shumë se 4 për qind të votave – minimumi që duhet për të hyrë në parlament.
Golob pritet të krijojë shumicën me Social-Demokratët dhe të bëhet kryeministër i ri i shtetit.
Jansha, një admirues i ish-presidentit amerikan, Donald Trump, është akuzuar nga opozita gjatë fushatës zgjedhore se ka tentuar të dëmtojë institucionet demokratike dhe lirinë e mediave.
Golob, 55-vjeçar, inxhinier karizmatik, është zotuar në fjalimin e tij të fitores se rezultatet “do të na mundësojnë t’ia kthejmë lirinë shtetit”.
Prej kur Jansha ka rifituar pushtetin më 2020, mijëra sllovenë kanë protestuar rregullisht në rrugë, duke thënë se ai ka shfrytëzuar pandeminë e koronavirusit për të kufizuar liritë e banorëve dhe mediave.
Por kush është Robert Golob?
Robert Golob vjen nga Partia e Gjelbër, ku ka mbajtur një pozicion kyç prej më pak se një viti, duke theksuar luftën e tij kundër ndryshimeve klimatike dhe pavarësinë e sistemit shtetëror nga ndikimet e jashtme.
Analistët thonë se siç erdhën gjërat, Golob do të bëhet kryeministri i ri i Sllovenisë, dhe falë mendimeve dhe projekteve të tij, pritet të jetë i suksesshëm.
Në vend të dytë u rendit Janez Jansha dhe partia e tij SDS me 22.5 për qind të votave, që do të thotë 26 vende.
Sipas rezultateve të para, në parlamentin slloven do të hyjnë pesë parti dhe parlamenti ka 90 deputetë.
