Komisioni Europian nënshkroi sot një marrëveshje me kompaninë farmaceutike daneze, “Bavarian Nordic” për mbi 110 mijë doza vaksinash për të luftuar shpërthimin e vazhdueshëm të lisë së majmunëve.
Ndryshe nga vaksinat e COVID-19/ës, që u kontraktuan nga Komisioni Europian, por paguheshin individualisht nga vendet e BE-së, kontrata mbi vaksinat për linë e majmunëve, fillimisht do të financohen nga buxheti i përbashkët i BE-së.
Kjo është hera e parë që buxheti i BE-së po përdoret për të blerë vaksina, në mënyrë që të mund të shpërndahen sa më shpejt në vendet anëtare. Që nga data 18 maj e këtij viti, rreth 900 raste të lisë së majmunëve janë raportuar në 19 vende të Bashkimit Europian, si dhe në Norvegji e Islandë. Dërgesat e para të dozave do të fillojnë në fund të qershorit, në ato vende që kanë më shumë nevojë.
Lia e majmunëve është një virus që e ka origjinën tek kafshët e egra, si brejtësit e primatët e që ndonjëherë kalon edhe tek njerëzit. I përket të njëjtës familje virusesh të lisë.
Infektimi i parë tek njeriu ndodhi në vitin 1970 dhe u regjistrua te një djalë në një zonë të largët të Kongos, në Afrikë. Në vitin 2003, 47 persona në gjashtë shtete amerikane u infektuan nga qentë e egër që jetonin pranë disa gjitarëve të vegjël të importuar nga Gana.
Organizata Botërore e Shëndetësisë vlerëson se tashmë ka mijëra raste të tilla në vit, kryesisht në vende afrikane dhe se kjo sëmundje mund të rezultojë fatale për një në dhjetë persona. Shumica e pacientëve të infektuar me linë e majmunit kanë vetëm temperaturë, dhimbje në trup, ethe e lodhje, simptomat më të zakonshme. Njerëzit e sëmurur më rëndë, mund të kenë irritim të lëkurës në fytyrë dhe duar e që mund të përhapet në pjesë të tjera të trupit.