Mbrëmjen e sotme në orën 21:00 në “Air Albania” do të luhet finalja e Conference League, mes Romës dhe Feyenoord, e cila është e para finale europiane që zhvillohet në vendin tonë dhe do të transmetohet ekskluzivisht falas për abonentët e Digitalb në “Super Sport 2”.
Ndërsa na ndajnë edhe disa orë nga kjo ndeshje, mediet italiane ngrenë alarmin në lidhje me trazirat, që kanë ndodhur mbrëmjen e djeshme në Tiranë nga tifozët e holandezë dhe italianë, dhe që mund të ndodhin gjatë ditës së sotme.
Nga raportimet në Itali theksohet se mes tifozëve të Romës ka grekë dhe turq të infiltruar, të cilët sipas medieve italiane mund të shkaktojnë rrëmuja dhe skena dhune.
“Corriere dello Sport” thekson se mbështetës të PAOK-ut dhe të Fenerbahçes, të cilët janë armiq të deklaruar të Feyenoord janë përzierë me tifozët e Romës.
Tifozët e Feyenoord vazhdojnë të jenë të grumbulluar në pedonale, në pritje të orës së ndeshjes për t’u zhvendosur në stadiumin Air Albania në kuadër të finales së COnference League. Atmosfera mbetet e zjarrtë me holandezët që janë duke shijuar muzikën e lartë, pijet alkoolike ndërsa mbeten optimisë për triumfin ndaj Romës.
Holandezët janë të zhurmshëm ndërsa kanë përfituar edhe nga muzika për ta bërë më të këndshme qëndrimin e tyre në kryeqytetin shqiptar dhe aktualisht po dhurojnë pamje vërtet të bukura, ndryshe nga sa ndodhi mbrëmjen e së martës.
