Dëgjo live TOP ALBANIA RADIO
Dëgjo live TOP GOLD RADIO
Dëgjo live MY MUSIC RADIO
Voto në THE TOP LIST
Aktualitet

Merkel viziton Shqipërinë, histori fjalësh, investime minimale!

Ndonëse Gjermania konsiderohet si motori ekonomik i BE-së dhe një nga donatoret kryesore të politikave mbështetëse për vendet në zhvillim, investimet e huaja direkte nga sipërmarrjet gjermane në Shqipëri thuajse mungojnë. Sipas të dhënave nga Banka e Shqipërisë, stoku i investimeve të huaja direkte nga Gjermania pas viteve ‘90 është vetëm 183 milion euro ose 2% e totalit.

Në sondazhet e publikuara nga Dhoma Gjermane e Tregtisë, sipërmarrjet gjermane shpesh janë ankuar për nivelin e lartë të korrupsionit, mungesën e rregullave të lojës, tregtinë e pandershme, etj, çka i ka mbajtur larg vendit tonë, ndryshe nga shtetet e tjera të rajonit ku përqëndrimi i investimeve gjermane është më i madh.

Të dhënat e INSTAT-it bëjnë të ditur se Gjermania është partneri i katërt i Shqipërisë për eksportet në 2019-ën, me 4.7% të totalit. Shqipëria ka një varësi të madhe nga Italia, me gati 48% të totalit që i vuri në vështirësi eksportuesit vendas, sidomos të tekstileve e këpucëve gjatë periudhës së pandemisë koronavirus. E dyta është Kosova, 10% dhe e treta Spanja, me 8%, kryesisht për eksportet e naftës bruto.

Në këto nivele, Shqipëria ishte e parafundit në rajon, përveç Malit të Zi për peshën që zë Gjermania në eksportet e rajonit. Për 2019-ën, e para ishte Maqedonia e Veriut me gati 49%, Bosnje Hercegovina 15%, Serbia 13% e Kosova 8%. Si referencë merret 2019-ta, për shkak se ishte vit normal, pa përçarjen që shkaktoi pandemia në zinxhirin e eksporteve.

Produkti më i eksportuar nga Shqipëria drejt Gjermanisë janë tekstilet e këpucët, me 53% ndryshe nga vendet e tjera të rajonit ku mbizotërojnë produktet e makinerive e pajisjeve, si dhe materialet kimike. Edhe për importet, Shqipëria është partnerja e fundit e Gjermanisë në rajon, me 7.2% të totalit.