Bota

Ministri francez: Anëtarësimi i Ukrainës në BE mund të zgjasë deri në 20 vjet

Ministri francez për Evropën, Clement Beaune, ka thënë se çfarëdo oferte e Bashkimit Evropian për anëtarësim të Ukrainës në bllok do të merrte 15-20 vjet kohë për finalizim të procesit.

“Duhet të jemi të sinqertë. Nëse thoni se Ukraina do t’i bashkohet BE-së në gjashtë muaj, brenda një viti apo dy, jeni duke gënjyer”, ka thënë Beaune për një radio franceze më 22 maj.

“Mund të zgjasë 15-20 vjet, ky proces merr kohë”.

Ai ka thënë se nuk dëshiron të krijojë iluzione te ukrainasit apo t’i gënjejë ata.

Këto komente kanë ardhur pasi presidenti francez, Emmanuel Macron ka sugjeruar që Ukraina të ftohet për t’iu bashkuar një komuniteti politik “të lidhur” me BE-në.

“Neve nuk na duhen kompromise të tilla”, ka thënë Zelensky në Kiev, në një konferencë të përbashkët për media me kryeministrin portugez, Antonio Costa më 21 maj.

“Sepse, më besoni, nuk do të jetë kompromis me Ukrainën në Evropë. Do të jetë kompromis në mes të Evropës dhe Rusisë”, ka thënë Zelensky.

Presidenti rus, Vladimir Putin, ka urdhëruar më 24 shkurt, atë që e quan “operacion special ushtarak” për të çmilitarizuar Ukrainën.

Perëndimi është përgjigjur me sanksione të ashpra ndaj Rusisë, duke shënjestruar ekonominë e shtetit dhe oligarkët rusë.

Kujtojmë se presidenti i Francës, Emmanuel Macron, paralajmëroi të hënën se mund të duhen dekada derisa Ukraina të anëtarësohet në Bashkimin Evropian dhe propozoi krijimin e një organizate të re politike, për të bashkuar vendet e kontinentit që ndajnë vlerat e BE-së, por që nuk janë pjesë e bllokut.

Gjatë fjalimit në Strasburg në Ditën e Evropës, Macron tha se “të gjithë ne e dimë shumë mirë se procesi për anëtarësimin [e Ukrainës] do të marrë disa vite, në fakt ndoshta disa dekada”.

Këto komente ai i bëri pasi presidentja e Komisionit Evropian, Urusla von der Leyen, tha se planifikon që të japë në qershor opinionin për kërkesën e Ukrainës që t’i bashkohet bllokut.

Sapo të jepet statusi i shtetit kandidat, procesi për anëtarësim në BE zakonisht merr kohë disa vjet, pasi kërkohet vendim unanim i të gjitha shteteve anëtare, por edhe shtetet aspiruese duhet të plotësojë të gjithë kapitujt negociues të anëtarësimit.

Pasi Rusia nisi pushtimin e Ukrainës, liderët e BE-së kanë thënë se do të tentojnë të përshpejtojnë procesin e anëtarësimin e Ukrainës në bllok.

Deri më tani, Ukraina ka vetëm Marrëveshjen e Asoocimit me BE-në, e cila mëton që të hapë tregjet e shtetit dhe ta sjellë atë më pranë Evropës.

Megjithatë, Macron tha se një procedurë e përshpejtuar për Ukrainën do të çonte në uljen e standardeve, ide të cilën ai e kundërshton.

“Bashkimi Evropian, duke pasur parasysh nivelin e integrimit dhe ambicien, nuk mund të jetë e vetmja mënyrë për të strukturuar kontinentin evropian në terma afatshkurtër”, tha ai.

Në vend të kësaj, Macron propozoi atë që e quajti “Komunitet Politik Evropian”, që mund të jetë i hapur për shtetet që nuk i janë bashkuar BE-së, sikurse Mbretëria e Bashkuar, e cila është larguar nga blloku.

“Kjo organizatë e re evropiane do t’u mundësojë të gjitha shteteve evropiane, që u përmbahen vlerave tona thelbësore, që të gjejnë një hapësirë të re për bashkëpunim politik, siguri, bashkëpunim energjetik, në fushën e transportit, investimeve, infrastrukturës dhe lëvizjes së njerëzve”, tha Macron.

Presidenti francez shtoi se anëtarësimi në këtë organizatë të re, megjithatë, nuk do të garantonte një anëtarësim të ardhshëm në BE.

Ideja është mirëpritur nga kancelari gjerman, Olaf Scholz, i cili e përshkroi atë si “një sugjerim mjaft interesant për t’u përballur me sfidën më të madhe me të cilën përballemi”.