Ka shkuar në 128 persona numri i të vdekurve nga shirat e dendur në Recife, kryeqyteti i shtetit brazilian të Pernambuco.
Mbi 9,300 njerëz janë evakuuar dhe 34 komuna kanë shpallur gjendjen e jashtëzakonshme, tha guvernatori i Pernambuco, Paulo Camara në një konferencë për shtyp.
Camara shtoi se përpjekjet e shpëtimit për të mbijetuarit e mundshëm kanë marrë fund.
Pernambuco ka regjistruar shira të dendur që nga java e kaluar, të cilat u intensifikuan gjatë fundjavës, duke vrarë më shumë se 100 njerëz, kryesisht në ultësirë që pësuan rrëshqitje të mëdha dheu.
Qeveria e shtetit do të dëmshpërblejë familjet e viktimave dhe do të japë 1500 realë (rreth 312 dollarë amerikanë) për të gjithë të zhvendosurit nga shirat, shumë prej të cilëve humbën të gjithë pasurinë e tyre.
Shirat kanë prekur edhe shtetet braziliane Sergipe, Alagoas, Paraiba dhe Rio Grande do Norte.
