Hetem Qerimaj, “Mjeshtri i Madh” i violinës, është ndarë nga jeta në moshën 88-vjeçare.
“Te nderuar miq, me dhimbje ju njoftoj ndarjen nga kjo jete te babit tim te dashur Hetem Qerimaj. Zoti e pranofte ne parajse”, ka njoftuar djali i tij, Fatos Qerimaj.
Në një intervistë televizive tre vite më parë, ai tregonte se për të skena është jetë.
Violina e ka shoqëruar “Mjeshtrin e Madh” përgjatë gjithë jetës. Ai ka qenë aktiv deri vonë dhe në 85-vjetorin e tij mbajti një koncert të titulluar “Harku i Triumfit të Qerimajve” në Amfiteatrin e Liqenit, së bashku me breza të tjerë artistësh nga e njëjta familje.
Për 18 vite punoi si violinist pranë Filarmonisë Shqiptare (5 vjet) dhe në orkestrën e Teatrit të Operas (13 vjet te tjera).
Gjithë pjesën tjetër të veprimtarisë e kreu pranë Orkestrës së Ansamblit të Ushtrisë, pranë të cilit doli edhe në pension pas 34 vjet punë artistike.
