Bota

Ndryshimi i klimës, paralajmërimi i ekspertëve nuk do t’ju pëlqejë aspak!

Ndryshimi i klimës mund të kthehet vërtet në një katastrofë për mbarë njerëzimin. Për këtë ne duhet të përgatitemi për skenarët më të këqij, si shkatërrimi i popullsisë apo edhe zhdukja e njeriut. Parashikimi i tmerrshëm vjen nga një grup ndërkombëtar ekspertësh, të udhëhequr nga Universiteti i Kembrixhit, i cili kreu një studim të botuar në revistën e Akademisë Amerikane të Shkencave (PNAS).

Sipas studimit, përpara skenarëve më të këqij, ne duhet t’i përqendrojmë përpjekjet kërkimore në katër çështje thelbësore: urinë dhe kequshqyerjen, ngjarjet ekstreme të motit, luftërat dhe sëmundjet e transmetuara nga vektorët (si rriqrat dhe mushkonjat). Studiuesit në veçanti i kërkojnë Panelit Ndërqeveritar për Ndryshimet Klimatike (IPCC) që t’i kushtojë një raport pasojave të tyre ekstreme, për të nxitur komunitetin shkencor dhe për të informuar qytetarët. Autori i parë i studimit, Luke Kemp nga Universiteti i Kembrixhit thotë se:

Ka shumë arsye për të besuar se ndryshimi i klimës mund të bëhet katastrofik, madje edhe në nivele modeste të ngrohjes. Ndryshimet klimatike kanë luajtur një rol në çdo ngjarje të zhdukjes masive. Ka favorizuar rënien e perandorive dhe ka formësuar historinë. Edhe bota moderne duket se është përshtatur me një kamare të veçantë klimatike. Fatkeqësia nuk vjen vetëm për shkak të pasojave të drejtpërdrejta të temperaturave të larta, si ngjarjet ekstreme të motit. Efektet zinxhir si krizat financiare, konfliktet dhe epidemitë e reja mund të shkaktojnë fatkeqësi të tjera dhe të parandalojnë rimëkëmbjen nga fatkeqësitë e mundshme si lufta bërthamore.

Modelet e përdorura nga ekspertët tregojnë se zonat me nxehtësi ekstreme (ato me një temperaturë mesatare vjetore mbi 29 gradë, ku sot jetojnë rreth 30 milionë njerëz midis Saharasë dhe bregut të Gjirit) mund të shtrihen në atë mënyrë që do të prekë deri në dy miliardë njerëz deri në vitin 2070. Një nga autorët e studimit, Chi Xu i Universitetit të Nanjing thekson se:

Këto temperatura dhe pasojat e tyre sociale dhe politike do të ndikojnë drejtpërdrejt në dy fuqi bërthamore dhe shtatë laboratorë të kontrollit maksimal që strehojnë patogjenët më të rrezikshëm. Ekziston një mundësi e madhe e efekteve katastrofike të zinxhir.