Një avion privat me 22 persona në bord, mes tyre shtetas indianë është zhdukur në një zonë malore të Nepalit. Mjeti fluturues “Otter 9N-AET”, i linjës “Tara Air” u ngrit nga qyteti Pokhara e po drejtohej për në Jomsom.
Fanindra Mani Pokharel, një zyrtar i lartë i Ministrisë së Brendshme, konfirmoi se ka nisur një operacion kërkim-shpëtimi.
Në avionin që humbi kontaktet sot në mëngjes pasi u ngrit në fluturim, ishin 19 pasagjerë dhe tre anëtarë të ekuipazhit.
Prej disa ditësh, në zonë ka reshje shiu, por moti i keq nuk përbën problem dhe fluturimet kanë vazhduar normalisht. Kjo pjesë e Nepalit frekuentohet rregullisht nga ekskursionistë të huaj, të cilët ngjiten nëpër shtigjet e malit edhe me pelegrinë nga India e Nepali, që vizitojnë tempullin Muktinath.