Aktualitet

Nesër “Dita pa Makina” në Tiranë/Kufizim lëvizjesh në disa segmente!

Përveçse pushim zyrtar, nesër do të jetë edhe një ditë pa makina në Tiranë. Njoftimin e dha kryebashkiaku Erion Veliaj:

E di që fëmijët mezi e presin një ditë pa makina, ndaj nesër, e martë 22 Mars, si ditë pushimi zyrtar, do rikthejmë sërish harenë e ajrin e pastër në Tiranë, duke ju bashkuar nismës së Qeverisë Shqiptare për qytetet që kursejnë naftë e tym, e lëvizin shëndetshëm!

Në kuadër të “Ditës pa makina”, Bashkia e Tiranës pritet të organizojë një sërë aktivitetesh. Për mbarëvajtjen e tyre, në bashkëpunim me Policinë e Shtetit dhe Policinë Bashkiake, Bashkia ka marrë masa për kufizimin e qarkullimit të automjeteve në disa rrugë të qytetit.
Sipas planit, do të kufizohet qarkullimi i automjeteve nga ora 09:00 deri në orën 15:00, në segmentet:

• Bulevardi “Dëshmorët e Kombit” nga Ministria e Brendshme deri në fillim të “Ish-Hotel Dajti”.

• Bulevardi “Dëshmorët e Kombit” nga Ura e “ish Hotel Dajtit” deri në kryqëzimin me rrugën “Ismail Qemali”.

• Segmenti i rrugës “Myslym Shyri” nga kryqëzimi i Gjykatës së Lartë me drejtim dalje në Bulevardin “Dëshmorët e Kombit”.

Qarkullimi i automjeteve, mjeteve të emergjencës dhe Policisë së Shtetit do të bëhet, sipas planit të lëvizjes më poshtë:

Për bllokimin e segmenteve në Bulevardin “Dëshmorët e Kombit” nga Ministria e Brendshme deri në fillim të “ish-Hotel Dajtit” dhe Bulevardi “Dëshmorët e Kombit” nga Ura e “ish-Hotel Dajtit” deri në kryqëzimin me rrugën “Ismail Qemali”:

• Qarkullimi i automjeteve, mjeteve të  emergjencës dhe Policisë së  Shtetit do të  bëhet, në rrugët “Lek Dukagjini”, rruga “Ibrahim Rugova”, rruga “Abdyl Frashëri”, “Papa Gjon Pali II”, në Blv “Zhan D’ Ark” dhe Blv “Bajram Curri”
Për bllokimin e segmentit të  rrugës “Myslym Shyri” nga kryqëzimi i Gjykatës së Lartë me drejtim dalje në Bulevardin “Dëshmorët e Kombit”

• Qarkullimi i automjeteve, mjeteve të  emergjencës dhe Policisë  së  Shtetit do të  bëhet, në kryqëzimin e rrugës “Myslym Shyri” me rrugën “Ibrahim Rugova”, drejtim i detyruar djathtas.

Lidhur me itinerarin e lëvizjes së mjeteve të linjave urbane, do të vazhdojë lëvizjen si më poshtë:

• Të gjitha Linjat që kalojnë në rrugën “Abdi Toptani” të devijojnë në rrugën “Ibrahim Rrugova” me drejtim në Blv “Bajram Curri”.
• Linja “Tirana e Re” do të devijojë te sheshi Willson” dhe te “UFO”.