General Motors Co dhe LG Energy Solution nuk planifikojnë të vazhdojnë planet për një fabrikë të katërt të prodhimit të baterive në SHBA. Ndërmarrja e përbashkët e kompanive Ultium Cells LLC tha në gusht se po shqyrtonte një fabrikë në New Carlisle, Indiana, për një fabrikë të katërt të baterive në SHBA, që pritet të kushtojë rreth 2,29 miliardë euro. GM tha në një deklaratë se:
Ne kemi qenë shumë të qartë se plani ynë përfshin investimin në një fabrikë të katërt në SHBA, por ne nuk do të komentojmë mbi spekulimet.
LG Energy tha se diskutimet për një fabrikë të katërt mbeten në vazhdim por nuk është marrë asnjë vendim. Plani u raportua më herët nga ‘Wall Street Journal’. General Motors ende mund të vazhdojë me planet për të ndërtuar një fabrikë të re në Indiana me një partner të ri, thanë burimet. Prodhuesi i automjeteve në Detroit dhe kompania koreano-jugore po ndërtojnë një fabrikë 2.6 miliardë dollarësh në Michigan, e vendosur të hapet në 2024.
Në dhjetor, Ultium tha se do të rriste investimin e saj në një fabrikë prej 2,1 miliardë eurove në Tennessee që do të hapet më vonë këtë vit me 252 milionë euro të tjerë. Muajin e kaluar, Departamenti i Energjisë i SHBA finalizoi një hua me kosto të ulët 2,2 miliardë euro për Ultium për të ndihmuar në pagesën e tre fabrikave.
Presidenti Joe Biden ka vendosur një objektiv që 50% e prodhimit të automjeteve në SHBA deri në vitin 2030 të jenë automjete elektrike ose hibride elektrike. GM planifikon të ndalojë shitjen e automjeteve me benzinë deri në vitin 2035, por ende po investon në prodhimin me motor me djegie të brendshme.
