Ka filluar prodhimi i hiper-makinës së parë nga 275 të planifikuara të Mercedes-AMG One në fabrikën e ndërtuar posaçërisht për të në Coventry të Mbretërisë së Bashkuar. Pas më shumë se pesë vite në zhvillim, duke përfshirë vonesat e detyruara nga puna për të përshtatur motorin hibrid temperament Grand Prix të makinës për përdorim rrugor, makinat e para për klientët po montohen në fabrikën e ndërtuar në vendin që dikur quhej “qyteti motorik” i Britanisë.
‘Drive’ raporton se 8 makina janë konfirmuar për pronarët e tregut australian, edhe pse “coupe-t” me timonin në anën e majtë nuk mund të regjistrohen për rrugë, teksa shumica e makinave pritet që të dërgohen deri në mesin e vitit të ardhshëm. Philipp Schiemer, udhëheqës i Mercedes-AMG në një deklaratë zyrtare tha se:
Mercedes-AMG One është një nga projektet më ambicioze që ne kemi ndërmarrë që nga zhvillimi deri tek prodhimi.
Britania ishte zgjedhur si vend për ndërtimin e fabrikës së montimit për shkak të afërsisë me fabrikën e motorëve të Mercedes-AMG në qytetin e Brixworth, edhe pse të gjitha makinat dërgohen në Gjermani, shtëpinë historike të AMG në Affalterbach, për detajet përfundimtare dhe dërgimin tek pronarët. Fabrika në fjalë gjithashtu gjendet më pak se 70 kilometra larg nga baza e ekipit të Formula 1 të Mercedes-AMG në Brackley. Mercedes në deklaratën e tyre zyrtare ka bërë me dije se:
AMG ka punuar me partnerin e prodhimit Multimatic, specialist në prodhimin e volumit të ulët, të cilët më parë ishin kontraktuar edhe nga Aston Martin dhe nga Ford në lidhje me makinën e saj GT, për të ndërtuar një fabrikë të dedikuar për prodhimin e serive të vogla.
