Për shkak të motit të keq, në Vlorë ndalohet lundrimi i mjeteve të vogla, deri nesër 28 dhjetor. Vendimi i Kapitenerisë, nuk prek tragetet.
1.Në bazë të parashikimit për situatën hidrometeorologjike të përkeqësuar në gjirin e Vlorës dhe jashtë saj për datat 26-27.12.2021 në drejtimin Jug-JugLindje në forcën 4-5bft, 7-10m/s, lartesi dallge 0.50-1.00m brenda gjirit të Vlorës dhe jashtë gjirit të Vlorës në forcën 6-7 deri 8bft 15-20m/s dhe lartësi dallge nga 1.50 deri 2.50 metra.
2. Është ndaluar dhënia e leje-nisjes e të gjitha mjeteve të vogla lundruese , anijeve të peshkimit që operojnë jashtë gjirit të Vlorës dhe marrjen e masave për sigurimin e tyre.
3. Me kushtet hidrometeorologjike te parashikuara, trageti i linjes Vlore-Brindisi-Vlore nuk ka pezullime për kryerjen e aktivitetit.
4. Përkeqësimi i situatës meteorologjike të përkeqësuar në gjirin e Vlorës dhe jashtë saj për mjetet e vogla lundruese dhe të peshkimit do të jetë mbas datës 28.12.2021/06:00.
Ndërkaq, në Gjirokastër, banorët e lagjes Lënxat në Lazat vazhdojnë të qëndrojnë të izoluar nga pjesa tjetër e fshatit. Nga shirat që bien papushim, dalja e Përroit të Sopotit nga shtrati e bën të pamundur kalimin e automjeteve dhe kalimtarëve.
Po si rezultat i shirave të rrëmbyer, janë krijuar probleme në furnizimin me energji elektrike në disa zona në Gjirokastër. Defekte serioze ka në katër fidera të linjës 10 kV. Me ndërprerje përballen banorët në Kordhocë të Lazaratit, në Bulo, disa fshatra të njësive administrative Zagorie, Grapsh, Dropull, si dhe në Maricaj të njësisë Buz. Grupet e OSHEE-së Rajoni Gjirokastër ndodhen në terren për riparimin e dëmeve.
Operatori i Sistemit të Shpërndarjes, (OSSH) bën të ditur se po vijon puna për riparimin e defektit në dy fiderat e nenstacionit Shkodra 1.
Megjithë kushtet e këqija të motit, grupet e avarisë së OSSH Shkodër janë në terren duke punuar për riparimin e defektit në dy fidera të nënstacionit Shkodra 1 dhe rikthimin e energjisë sa më parë tek tē gjithë abonentët.
Shqipëria është sot nën “darën” e motit të keq, me reshje shiu e gjithashtu dëbore. MeteoAlb njofton për kushte të paqëndrueshme atmosferike në këtë fillimjavë ndërsa jemi në ditët e fundit të vitit 2021. Më të dendura, shirat janë në zonat veriore e pjesërisht në qendër të territorit, ku intensiteti i tyre është i lartë. Në zonat e thella malore priten reshje të pakta dëbore, kryesisht verilindja. Temperaturat luhaten në vlerat nga 1 në 18 gradë celcius.