Aktualitet Politikë

PD kundër emërimit të Neritan Nallbatit në krye të Policisë Kriminale!

Shefi i Organizimit në Partinë Demokratike, Klevis Balliu deklaroi sot se emërimi i Neritan Nallbatit në postin e drejtorit të Policisë Kriminale është “skandali i radhës i qeverisë”. Në një deklaratë për mediat, Balliu u shpreh se “Neritan Nallbati emërohet drejtor i Policisë Kriminale, në institucionin me demek të reformuar të Gledis Nanos, edhe pse ai u largua në vitin 2003 si bashkëpunëtor i “Hakmarrjes për Drejtësi””.

Nallbati është famëkeq sidomos si protektor i “Rrugëve të kokainës”, gjatë kohës si drejtor i Policisë së qarkut Elbasan. Aktiviteti i tij në mbështetje të narkotrafikut ndërkombëtar kulmoi me rastin “Xibraka”.  Sipas raporteve mediatike dhe konfidenciale, Neritan Nallbati e ka vazhduar pa ndërprerje rolin e mbështetësit të aktiviteteve të paligjshme dhe të infiltruar të botës së krimit në Polici, edhe në kohën kur drejtonte Policinë e Durrësit. Që prej tetorit 2021 në portin më të madh në vend ka patur një rritje eksponenciale të trafikut të drogës. Emërimi i tij në krye të policisë kriminale është rasti i përsëritur i promovimit të korrupsionit në hierarkinë e lartë të Policisë së Shtetit. Eshtë tregues se nuk është gara dhe ndershmëria që të ndihmon të bësh karrierë, por përfshirja në afera dhe korruptimi thelbësor.

Balliu shtoi se “Partia Demokratike dënon vendimin e Drejtorit të Përgjithshëm të Policisë”.

Një si Neritan Nallbati nuk do të pranohej as roje në oborrin e FBI dhe jo më në hierarki i lartë. Absurde është që një të dyshuar dhe të shkarkuar për lidhje me krimin ta emërosh në krye të luftës kundër krimit. Ne dënojmë edhe kriminalizimin e uniformave blu e në të njëjtën kohë theksojmë se trupa e Policisë nuk është e korruptuar. Në të ka profesionistë të përkushtuar dhe atdhedashës të ndershëm. Shefat e tyre, nën shembullin më të mirë të shefave politikë në parti e kanë kthyer armën e Policisë në një paradhomë partiake, ku u merret nderi edhe atyre, edhe Shqipërisë. Me policë si Neritan Nallbati në krye të punëve, Policia dhe Shqipëria janë në rrezik.