30 anëtarë të Kryesisë së Forumit Rinor të Partisë Demokratike depozituan sot një peticion drejtuar Sekretarit të Përgjithshëm, Gazment Bardhi dhe kreut të Këshillit Kombëtar, Edi Paloka për thirrjen e një referendumi pas përjashtimit të Sali Berishës nga grupi parlamentar. Sipas tyre, anëtarësia duhet të vendosë pasi u shkelën statuti dhe vlerat e PD-së.
Po ju drejtohemi nëpërmjet këtij peticioni lidhur me situatën e paprecedentë të krijuar nga vendimi personal i Kryetarit të Partisë Demokratike për përjashtimin e Profesor Doktor Sali Berishës nga Grupi Parlamentar. Duke e konsideruar këtë veprim në shkelje të plotë të statutit, parimeve, vlerave të Partisë Demokratike, si dhe për rrezikun që mbart për përçarjen e thellë e të parikuperueshme të saj, kërkojmë që ky veprim t’i nënshtrohet me domosdoshmëri një referendumi në anëtarësinë e partisë, si e vetmja rrugë për të ruajtur unitetin e Partisë Demokratike të Shqipërisë.
Vetë Sali Berisha e konsideron “nul” vendimin e kryetarit Basha. Ky vendim iu kërkua nga Shtetet e Bashkuara që e kanë shpallur “non grata” ish-liderin historik të PD-së. Berisha e konsideron veten pjesë të grupit demokrat e ka paralajmëruar se nga nesër do të zbresë në terren e do të nisë takimet me anëtarët e PD-së në Tiranë. Ai synon të mbledhë firmat për të kërkuar referendum në lidhje me vendimin individual të Lulzim Bashës dhe më pas do të shkojë në Shkodër.
