Bota

Përmbytjet në Europë, Gjermania me numrin më të lartë të viktimave!

Kancelarja gjermane, Angela Merkel shprehu tronditjen për katastrofën e përmbytjeve që po përjeton Gjermania në pjesën perëndimore.

Në një mesazh në Twitter, Merkel shkruan:

Jam e tronditur nga katastrofa që kaq shumë njerëz duhet të vuajnë pasojat prej përmbytjeve. Solidariteti im shkon për familjet e të vdekurve dhe të zhdukurve. Falenderoj nga zemra ekipet e shpëtimit që po angazhohen në ndihmë të popullsisë!

Të paktën 46 viktima dhe dhjetëra të zhdukur është bilanci aktual në perëndim të Gjermanisë për shkak të përmbytjeve nga shirat e vazhdueshëm. Një numër i madh shtëpish rrezikojnë të shemben në Schuld, në shtetin e Rhineland-Palatinate.

Reshjet intensive të shiut në të gjithë Gjermaninë Perëndimore shkaktuan dëme në prona, mbyllje autostradash, evakuime masive dhe disa viktima gjatë natës. Gjatë operacioneve të shpëtimit humbën jetën edhe dy zjarrfikës në rajonin e Maerkischer Kreis në shtetin e North Rhine Westphalia.

Stuhi të dhunshme përfshinë Gjermaninë, veçanërisht në perëndim.

Në Nordrhein-Westfalen, rajoni më i populluar i Gjermanisë, reshjet e rrëmbyeshme të shiut shkaktuan dëme të mëdha, veçanërisht në disa azile të moshuarish.
Në disa lokalitete, uji nëpër rrugë arriti deri në një metër lartësi.

Në Hagen, sipas shërbimeve të urgjencës, përrenjtë dolën nga shtretërit e tyre duke zhvendosur grumbuj mbeturinash, që bllokuan rrugët. Rajonet fqinje të Saar dhe Rhineland-Palatinate, si edhe Mecklenburg-Vorpommern (në verilindje) janë në gatishmëri për stuhi.

Landet e tjera veriore gjithashtu pritet të përjetojnë stuhi, të shoqëruara nga shira të rrëmbyeshëm dhe breshër. Holanda ka dislokuar ushtrinë ndërkohë që përmbytje të mëdha goditën rajonet e saj kufitare me Gjermaninë.

Dhjetëra njerëz u detyruan të largohen për arsye sigurie në provincën juglindore të Limburg ndërsa janë vendosur në ambiente sportive dhe hotele. Trupat u dërguan për të mbrojtur banorët prej vërshimit të ujit nga shirat e rrëmbyeshëm që çuan në përmbytjen e një numri të madh të bodrumeve, apartamenteve dhe lokaleve të biznesit.

Qindra familje nuk kanë energji elektrike dhe shumë pjesë të sistemit të autostradave holandeze janë të mbyllura. 6 të vdekur është bilanci i përmbytjeve shkatërruese në provincën e Liezhit, në lindje të Belgjikës.

Guvernatorja e provincës, Catherine Delcourt, përmes një deklarate theksoi se ende ka disa persona të zhdukur. Për disa ditë, shirat e rrëmbyeshëm kanë rënë në këtë rajon, i cili është vendosur në gatishmëri maksimale.

Shirat kanë përmbytur shtëpi, ferma dhe impiante industriale.

Lumi Meuse, i cili kalon përmes Liezhit dhe Mastrihtit rrezikon të tejmbushet.