Ndërpritet seanca e Kuvendit të Kosovës pasi disa nga deputetët e Partisë Demokratike të Kosovës janë përplasur me ministrin e Bujqësisë, Faton Peci si dhe disa deputetë të Lëvizjes Vetëvendosje.
Para se të ndodhte incidenti, deputetët e PDK-së u larguan nga salla e Kuvendit me arsyetimin se nënkryetarja e Kuvendit të Kosovës, Saranda Bogujevci ishte duke e degjeneruar seancën.
Derisa deputetët e PDK-së po largoheshin nga salla, deputetët Memli Krasniqi dhe Ardian Kastrati u konfliktuan me ministrin e Bujqësisë, Faton Peci. Në këtë debat u përfshi edhe ministrja e Arsimit, Arbërie Nagavci si dhe disa deputetë të Lëvizjes Vetëvendosje, përfshirë Salih Zybën dhe Besim Muzaqin.
Konfliktit i parapriu një debat i ashpër në mes të deputetëve të opozitës si dhe të atyre nga radhët e Vetëvendosjes. Vërejte për udhëheqjen e seancës patën edhe deputetët e Lidhjes Demokratike të Kosovës të cilët u larguan nga salla.