Tashmë e kemi mësuar që pas një jave të ngarkuar, siç ishte ajo që lamë pas, vjen një javë disi më e qetë. E tillë është edhe kjo në të cilën sapo kemi hyrë.
Këtë herë do të njihemi me katër projekte të reja muzikore. Si fillim kemi një bashkëpunim mjaft interesant, Stine, G-Bani dhe Renis të cilët kanë sjellë “Xhemile”. Një këngë kjo që të ngel në mendje dhe është e vështirë që të mos e këndosh bashkë me ta.
Ndërkohë Semi ka publikuar EP e tij, por që vetëm njëra nga këngët ka arritur që të vijë në listë, “Roulette”. Dj Geek ka sjellë “Love of mine”, sigurisht me praninë e Dafina Zeqirit që e bën akoma dhe më mahnitëse këtë projekt dashurie.
Koregrafi dhe muzikanti Tan Brama na ka bërë një surprizë para hyrjes së tij në “Big Brother VIP”. Projekti i tij “Like Jackson” ka marrë vëmendjen e fansave dhe jo pa të drejtë. Do t’i japë fama e tij aty brenda një shtysë më shumë këtij projekti?