Dëgjo live TOP ALBANIA RADIO
Dëgjo live TOP GOLD RADIO
Dëgjo live MY MUSIC RADIO
Voto në THE TOP LIST
Bota

Presidentit Joe Biden iu hoq një polip beninj, por potencialisht prekanceroz!

Në koloskopinë më të fundit, presidentit amerikan Joe Biden iu hoq një polip 3 milimetra që rezultoi të ishte adenomë tubulare, lezion beninj, me rritje të ngadaltë, potencialisht prekanceroz. Lajmin e bëri të ditur mjeku i Shtëpisë së Bardhë, Kevin O’Connor, sipas të cilit, polipi është i ngjashëm me atë që Biden-it iu hoq në 2008-ën dhe nuk ka nevojë për ndërhyrje të mëtejshme.

Shtëpia e Bardhë siguron se Biden është i shëndetshëm. Me 79 vite mbi shpatulla, ka hyrë në historinë e Amerikës si presidenti më i moshuar në detyrë.

Polipi që iu hoq, formohet në murin e kolonit apo zorrës së trashë dhe nëse nuk hiqet mund të degradojë në tumor. Për këtë arsye nevojitet dhe është i mjaftueshëm një kontroll rutinë, përmes kolonoskopisë.

Por, në njoftimin e mjekut nuk jepen detaje se kur do të zhvillohet kontrolli i radhës. Kujtojmë se gjatë kolonoskopisë, Joe Biden iu nënshtrua anestezisë së plotë dhe sipas Kushtetutës, kur presidenti nuk është në gjendje të marrë vendime, përkohësisht, detyra i kalon numrit dy të Shtëpisë së Bardhë, në këtë rast, zv.presidentes Kamala Harris, e cila u bë presidente e Amerikës për 25 minuta. Ndonëse zyrtarisht nuk mund të cilësohet kështu, në fakt, Harris bëri një zëvendësim siç parashikon amendamenti i 25-të.

Precedentët dhe “JO”-ja e Donald Trump

Që në 2002-shin e në vitin 2007, presidenti i kohës George W. Bush, për të njëjtin kontroll, ia kaloi detyrën zv.presidentit Dick Cheney. Më vonë në kohë, në 2019-ën, Donald Trump për të mos u dukur “i dobët” iu nënshtrua kolonoskopisë, por pa qetësues, që të mos i kalonte pushtetin Mike Pence-it.

Imazhet e Trump-it me këmishë të hapur e fytyrë të lodhur bënë xhiron e botës dhe u përfol për një iktus apo krizë ankthi. Por, libri i kujtimeve i ish-zëdhënëses së tij hodhi dritë: kolonoskopia ishte e vështirë dhe ai nuk donte ta bënte publike, për të mos përfunduar në shënjestrën e analistëve politikë.