Mot i keq me reshje shiu dhe stuhi ere që ka përfshirë vendin, ka lënë dy të rinj të plagosur në Kuçovë. Një djalë 26 vjeç ka rënë aksidentalisht nga taraca e shtëpisë tre katëshe si pasojë e erës së fortë. I riu ndodhet në spital në gjendje kritike për jetën. Ndërkohë si pasojë e stuhisë, një depozitë uji është shkëputur nga çatia dhe ka rënë sipër një 17 vjeçare, e cila ishte duke kaluar në rrugë. E mitura mori fraktura të shumta por është jashtë rrezikut për jetën.
Njoftimi i plotë i policisë së Beratit:
Dy ngjarje të rënda aksidentale kanë ndodhur si pasojë e stuhisë së erës në Kuçovë këtë të enjte, ku janë plagosur një djalë 26 vjeç dhe një 17-vjeçare.
Dy të rinjtë ndodhen në Spitalin Rajonal Berat në gjendje të rëndë.
Djali i cili ishte duke punuar për montimin e një paneli diellor në shtëpinë e një të afërmi të tij, ka rënë nga soleta e shtëpisë nga era e fortë.
Rrëzimi nga një lartësi rreth tre metër i ka shkaktuar të riut nga fshati Tapi në rrethin e Kuçovës fraktura dhe shembje në të gjithë trupin.
Majkëll Vrapi është gjetur pa ndjenja në tokë dhe është transportuar drejt Spitalit Rajonal Berat. Ai aktualisht ndodhet në sallën e operacionit në Repartin e Kirurgjisë, ndërkohë që mjekët deklarojnë se gjendja e tij është e rëndë.
Një tjetër ngjarje e rëndë ka ndodhur në afërsi të Spitalit të Kuçovës. Si pasojë e stuhisë së fortë, një depozitë uji është shkëputur nga çatia dhe ka rënë sipër një vajze 17 vjeç, e cila ishte duke kaluar në rrugë.
Vajza me inicialet S.K, është ngritur nga kalimtarët e rastit dhe është dërguar në spital. Edhe 17-vjeçarja ndodhet në Spitalin Rajonal të Beratit, ku po ekzaminohet nga mjekët. Ajo është jashtë rrezikut për jetën, edhe pse me fraktura dhe plagë të shumta.
