Të kesh vetëm dy fëmijë mund të jetë edhe një zgjedhje që meriton të vlerësohet, të paktën nëse prindërit janë Harry e Meghan Markle. “Population Matters”, organizatë bamirësie me seli në Mbretërinë e Bashkuar, që adreson çështjet demografike e ndikimin e tyre në mjedis, i konsideron shembuj për familjet e tjera.
Kjo për faktin se kanë zgjedhur të mos bëjnë më fëmijë pas djalit Archie Harrison e vajzës Lilibet Diana.
Vlerësimi iu jepet sot në Ditën Botërore të Popullatës të caktuar më 11 korrik nga Organizata e Kombeve të Bashkuara.
Promovuesit e fushatës për jo më shumë se dy fëmijë, nuk i kursejnë lëvdatat:
Vendim i ndritur! Duke zgjedhur e deklaruar publikisht qëllimin për ta kufizuar numrin e fëmijëve në dy, Duka e Dukesha e Sussex-it po i kontribuojnë garantimit të një të ardhmeje më të mirë për fëmijët e tyre dhe përbëjnë shembull për familjet e tjera!
Në një intervistë në 2019-ën, Harry e Meghan thanë për “Vogue” se me vullnetin për të garantuar impakt të qëndrueshëm mbi ambientin e planetin, vendosën të mos kenë më shumë se dy fëmijë.
Deklarata e tyre nuk kaloi pa polemika sidomos nisur nga udhëtimet nga kontinenti në kontinent me avionë privatë, nga të cilët nuk heqin dorë. Të shumtë pyesnin nëse kjo ishte sjellje e qëndrueshme?
Kritikët e çiftit nuk kanë ndryshuar qëndrim dhe stilin e tyre të jetesës e cilësojnë shumë më me ndikim në ekuilibrat e planetit se vendimi për zgjerimin ose jo të familjes.
Po William e Kate Middleton që kanë tre fëmijë, dy djem dhe një vajzë, çfarë mendojnë vallë?
