Bota Tech

TikTok dhe Instagram po ‘lënë pa punë’ Google!

Google ka publikuar disa të dhëna, të cilat janë disi shkatërruese kur bëhet fjalë për gjigantin e kërkimit në internet. Më saktësisht, sipas analizës, afër 40 % e Gjeneratës Z vendosin të kërkojnë në internet përmes aplikacioneve të njohura TikTok dhe Instagram, krahasuar me kërkimin në Google Search dhe harta.

Siç raportohet nga TechCrunch, CEO i Google Sundar Pichai theksoi se ai është i vetëdijshëm se formati TikTok po ndryshon mënyrën se si të rinjtë kërkojnë në internet dhe shtoi se Google dëshiron të vazhdojë me trendet globale. Një studim i brendshëm dhe statistikat e kompanisë tregojnë se gati 40 % e të rinjve, kur kërkojnë një vend ku planifikojnë të hanë drekë, nuk shkojnë në Google Maps ose nuk kërkojnë, por shkojnë në TikTok ose Instagram.

Google po planifikon disa ndryshime, të cilat duhet të tërheqin një audiencë më të re dhe kjo përfshin mundësinë që përdoruesi të lëvizë kamerën në një zonë dhe të ketë një pamje më të mirë të objekteve të disponueshme në një skenë më të gjerë. Tashmë ka pasur raporte se TikTok po bëhet gjithnjë e më shumë një kërcënim për Google, veçanërisht kur bëhet fjalë për shërbimin e videos YouTube të kompanisë. TikTok është aplikacioni me rritje më të shpejtë në segmentin e rrjeteve sociale dhe ka përjetuar një zgjerim të vërtetë në vitet e fundit. Të ardhurat nga reklamat e TikTok pritet të tejkalojnë YouTube deri në vitin 2024.

Rikujtojmë se, Google ka shkarkuar së fundmi një nga inxhinierët e saj, i cili tha se sistemi i inteligjencës artificiale të kompanisë ka ndjenja. Muajin e kaluar, Blake Lemoine doli publikisht me teorinë e tij se teknologjia gjuhësore e Google është e ndjeshme dhe prandaj duhet të respektohen “dëshirat” e saj. Google, plus disa ekspertë të AI, mohuan pretendimet dhe ditën e djeshme kompania konfirmoi se ai ishte shkarkuar. Lemoine i tha BBC-së se po merr këshilla ligjore dhe nuk pranoi të komentojë më tej.