Në “Euro 2020”, mbrëmjen e ditës së nesërme luhet takimi i Grupit F, Gjermani-Hungari në orën 21:00. Për sfidën e fundit në grup që do të zhvillohet në stadiumin e Bajernit në Mynih ka ardhur një propozim i veçantë. Kryebashkiaku i Mynihut, Dieter Reiter do të dorëzojë kërkesë në UEFA për të ndriçuar Stadiumin e Mynihut me ngjyrat e komunitetit të LGBT+.
Por, UEFA ka reaguar dhe ka vendosur që “Allianz Arena” nuk mund të shfaq më ngjyrat e ylberit në mbështetje të komunitetit LGBTQ + pasi beson se gjesti ka një kontekst politik. Kryebashkiaku i Munihut, Dieter Reiter, me mbështetjen e kryeministrit të Bavarisë, Markus Soder, i bëri thirrje organit drejtues të futbollit evropian që të lejojë “një sinjal gjerësisht të dukshëm për kuptimin tonë të përbashkët të vlerave” dhe të “punojë prerazi dhe dukshëm për tolerancën dhe barazinë”.
Sidoqoftë, UEFA e ka refuzuar kërkesën mbi bazën që ishte në përgjigje të ligjeve të reja në Hungari dhe propozoi datat alternative që stadiumi të shfaqte ngjyrat e ylberit.
Në një deklaratë nga UEFA thuhej se:
Racizmi, homofobia, seksizmi dhe të gjitha format e diskriminimit janë një njollë në shoqëritë tona dhe përfaqësojnë një nga problemet më të mëdha me të cilat përballet futbolli sot. Sjellja diskriminuese ka dëmtuar të dy ndeshjet edhe jashtë stadiumeve, po ashtu edhe ligjërimin online rreth sportit që duam. Sidoqoftë UEFA, përmes statuteve të saj, është një organizatë neutrale politikisht dhe fetarisht. Duke pasur parasysh kontekstin politik të kësaj kërkese specifike, një mesazh që synon një vendim të marrë nga parlamenti kombëtar hungarez, UEFA duhet ta refuzojë këtë kërkesë.
Rikujtojmë, se Federata Gjermane e Futbollit (DFB) rrezikoi të gjobitej për shkak të shiritit të kapitenit Manuel Neuer që ishte shumëngjyrësh si ylberi. UEFA nisi një hetim ndaj DFB-së lidhur me shiritin e portierit gjerman.
