Deri tani, vetëm 4 vende në botë kanë vendosur detyrimin për vaksinën anti-COVID: shteti ishullor Mikronezia, si dhe Turkmenistani, Taxhikistani e Indonezia. Madje kjo e fundit e dha urdhërin që në muajin shkurt kur ende nuk kishte nisur fushata e vaksinimit. Kush refuzon gjobitet deri në 400 euro.
Me objektivin për të minimizuar infektimet nga koronavirusi, për Mikronezinë, Turkmenistanin e Taxhikistanin, detyrimi për vaksinat hyri në fuqi në korrik.
Në një tjetër vend, Kazakistan, që në qershor u vendos detyrimi i vaksinimit për të paktën 60% të punonjësve në sektorë si shëndetësia e arsimi, si dhe për aktivitetet zbavitëse. Në korrik, masa u zgjerua për kazakët duke përfshirë edhe transportin e bankat.
Sa i përket Europës, deri tani asnjë vend nuk ka zgjedhur t’iu imponojë qytetarëve një detyrim të tillë. Por Italia u bë shteti i parë që vendosi detyrimin e punonjësve shëndetësorë për t’u vaksinuar.
Më pas, në të njëjtën linjë veproi Franca, që zgjodhi masa më shtrënguese, me prezantimin e Green Pass-it.
Deri në fund të muajit, Greqia vendosi vaksinimin e detyrueshëm anti-COVID për personelin shëndetësor ndërsa nga tetori, punonjësit e azileve në Mbretërinë e Bashkuar, i pret vaksina me detyrim ashtu si në Australi.
Në të tjera vende të botës, vaksinimi kundër koronavirusit përbën detyrim për disa kategori.
Në Shqipëri, Komiteti Teknik i Ekspertëve e vendosi për personelin shëndetësor, arsimtarët e studentët.
Nga muaji i ardhshëm, në Nju Jork duhet të vaksinohen punonjësit shëndetësorë që janë në kontakt me njerëzit.
Arabia Saudite e bën të detyrueshëm vaksinimin për punonjësit e sektorëve publik e privat që do të vendosin të jenë të pranishëm.